Unda Oliy ta’lim, fan va innovatsiyalar vaziri Qo‘ng‘irotboy Sharipov, Raqamli texnologiyalar vaziri Sherzod Shermatov, Oliy Majlis Qonunchilik palatasining Bola huquqlari bo‘yicha vakili, Bolalar ombudsmani Surayyo Rahmonova ishtirok etdi. 

Qayd etilganidek, forumning asosiy g‘oyasi bolalarni Vatanga sodiq farzand etib tarbiyalash, ularning huquq-manfaatlarini ifoda etish va himoya qilish, isteʼdod hamda qobilyatlarini namoyon etishdan iborat. 

Tadbirga so‘zga chiqqan Oliy ta’lim, fan va innovatsiyalar vaziri Qo‘ng‘irotboy Sharipov yoshlarga keyingi yillarda ta’lim sohasidagi yangiliklar, ijobiy o‘zgarishlar, shuningdek, maktab davridagi qiziqarli voqelar haqida so‘zlab berdi. Shuningdek, bugungi har qanday islohotda yoshlarning alohida o‘rni borligi va sohadagi o‘zgarishlarda ularning g‘oyalari, amalga oshirayotgan ishlari bilan yaqindan tanishish muhimligi ta’kidlandi.

– Bugun siz qadrli yoshlar bilan uchrashib turganimdan bag‘oyatda xursandman, – dedi vazir. – Albatta, sizlarning fikringiz, ilm-fanda erishayotgan yutuqlaringizni yuzma-yuz turib eshitish men uchun katta sharaf. Bizning asosiy maqsadimiz sohadagi har bir islohotimizda siz yoshlarning faolligingizni ko‘rish. Buning uchun sizlardan o‘z mehnat faoliyatingizga mehr qo‘yish, yaxshi o‘qish va yangi g‘oyalar ustida tadqiqotlar olib borish talab etiladi. Biz doimo sizlarni har tomonlama qo‘llab-quvvatlashga tayyormiz.

Samimiy suhbat davomida yoshlar vazirga o‘zlarining qiziqtirgan savollarini berib, unga batafsil javob oldilar. 

Bir nechta yoshlar Oliy ta’lim, fan va innovatsiyalar vazirligi va huzuridagi Innovatsion rivojlanish agentligi faoliyati bilan yaqindan tanishish niyatida ekanini aytib, shu imkoniyatni yaratib berishni so‘radilar. Ularga vazirlik va agentlik faoliyati bilan tanishish uchun barcha zarur sharoitlar yaratilishi bildirildi.