O‘zbekiston Respublikasi Oliy taʼlim, fan va innovatsiyalar vazirligi

Tashrifdan maqsad — 2025-yilda oliy taʼlim sohasida amalga oshirilgan islohotlar va erishilgan natijalarni tahlil qilish, shuningdek, 2026-yil uchun belgilangan ustuvor yoʻnalishlar doirasida olib borilayotgan ishlar holati va ularning samaradorligini oʻrganishdan iborat boʻldi.

Uchrashuv davomida S. Rajabovga 2026-yilda universitetda amalga oshirilishi rejalashtirilgan istiqbolli loyihalar, talabalar hamda professor-oʻqituvchilar uchun yaratilayotgan zamonaviy taʼlim, ilmiy-tadqiqot va ijtimoiy shart-sharoitlar haqida batafsil maʼlumot berildi. Xususan, zamonaviy texnika va ilgʻor uskunalar bilan jihozlangan ilmiy laboratoriyalar faoliyati bilan tanishtirildi.

Shundan soʻng vazirning birinchi oʻrinbosari viloyatdagi davlat oliy taʼlim muassasalari rektorlari bilan uchrashib, davlat rahbari tomonidan belgilangan ustuvor vazifalar hamda ushbu yoʻnalishlarda amalga oshirilayotgan islohotlar yuzasidan taqdim etilgan taqdimotlarni tingladi. Kelgusida bajarilishi lozim boʻlgan ustuvor vazifalar boʻyicha atroflicha fikr almashildi.

Vazirning birinchi oʻrinbosari Baliqchi Abu Ali ibn Sino nomidagi Jamoat salomatligi texnikumiga tashrif buyurdi. U texnikumda tashkil etilgan xorijiy tillarga oʻqitish kurslari faoliyati bilan yaqindan tanishdi. Jumladan, oʻquv jarayonlari, zamonaviy oʻqitish metodlari, tinglovchilarning bilim va koʻnikmalarini oshirishga qaratilgan dasturlar hamda malakali mutaxassislar tomonidan olib borilayotgan mashgʻulotlar taqdim etildi.

Shuningdek, xorijiy tillarni oʻrganish orqali oʻquvchilarning kasbiy salohiyatini oshirish, ularning xalqaro mehnat bozorida raqobatbardoshligini taʼminlash borasida amalga oshirilayotgan ishlar muhokama qilindi. Uchrashuv yakunida mazkur yoʻnalishdagi ishlarni yanada rivojlantirish, oʻquv dasturlarini takomillashtirish hamda ilgʻor tajribalarni joriy etish boʻyicha tegishli tavsiyalar berildi.

Tashrif yakunida Sardor Rajabov Andijon viloyatida Bilim va malakalarni baholash agentligining hududiy boʻlimi uchun qurib bitkazilayotgan bino bilan tanishdi. Obyektning texnik holati, infratuzilma taʼminoti hamda uni zamonaviy talablar asosida jihozlash masalalari yuzasidan masʼullarga aniq topshiriq va amaliy koʻrsatmalar berdi.