O‘zbekiston Respublikasi Oliy taʼlim, fan va innovatsiyalar vazirligi

Yig‘ilish avvalida oliy ta’lim tizimida olib borilayotgan islohotlar, ularning mazmun-mohiyati, shuningdek, davlatimiz rahbari tomonidan oliy ta’lim muassasalari oldiga qo‘yilayotgan dolzarb vazifalar haqida so‘z yuritildi. Ta’lim sifatini oshirish, ilmiy salohiyatni mustahkamlash, yoshlarni zamonaviy bilim va kasb-hunarlarga yo‘naltirish masalalari kun tartibining asosiy yo‘nalishlari sifatida qayd etildi. Yig‘ilishda O‘zbekiston Respublikasi oliy ta’lim, fan va innovatsiyalar vaziri o‘rinbosari O‘ktam Salomov so‘zga chiqib, O‘zbekiston Respublikasi Vazirlar Mahkamasining tegishli qaroriga asosan Berdaq nomidagi Qoraqalpoq davlat universiteti rektori lavozimiga Jollibekov Berdiyar Baxtiyarovich tayinlanganligini rasman e’lon qildi. Vazir o‘rinbosari yangi rektorni jamoaga tanishtirib, uning oliy ta’lim tizimidagi tajribasi, boshqaruv salohiyati va kelgusida universitet rivoji yo‘lida amalga oshirishi kutilayotgan asosiy vazifalarga alohida to‘xtalib o‘tdi. Shuningdek, Berdaq nomidagi Qoraqalpoq davlat universitetining hududiy va respublika miqyosidagi nufuzi, fan va ta’lim sohasidagi o‘rni yanada mustahkamlanishiga ishonch bildirdi. Yig‘ilish davomida universitet jamoasi vakillari tomonidan ham fikr-mulohazalar bildirilib, kelgusida yangi rahbariyat bilan hamkorlikda samarali ish olib borishga tayyor ekanligi ta’kidlandi. Ushbu uchrashuv Berdaq nomidagi Qoraqalpoq davlat universiteti hayotida muhim bosqich bo‘lib, oliy ta’lim muassasasining yanada rivojlanishi, zamonaviy talablar asosida takomillashuvi yo‘lida yangi imkoniyatlar eshigini ochishi bilan ahamiyatlidir.