Oliy taʼlimda natijalar va kelgusi maqsadlar muhokamasi
2025-12-24 16:25:00 / Vazirlik yangiliklari
Taqdimot davomida oliy taʼlim muassasalarining oʻtgan yildagi faoliyati har tomonlama tahlil qilinib, erishilgan natijalar, mavjud muammolar va ularni bartaraf etish yoʻllari muhokama qilindi. Ayniqsa, taʼlim sifatini oshirish, ilmiy-tadqiqot ishlarini kengaytirish, oʻquv jarayonini raqamlashtirish hamda oliy taʼlimni iqtisodiyot va hududlar ehtiyojlari bilan uzviy bogʻlash masalalariga alohida eʼtibor qaratildi.
Jumladan, Buxoro davlat universiteti, Fargʻona davlat universiteti, Andijon davlat universiteti hamda Oziq-ovqat texnologiyasi va muhandisligi xalqaro institutining 2025-yildagi faoliyat natijalari va 2026-yilga moʻljallangan rivojlanish rejalari atroflicha koʻrib chiqildi. Ushbu taʼlim muassasalarida zamonaviy taʼlim dasturlarini joriy etish, professor-oʻqituvchilar salohiyatini oshirish, talabalarning amaliy koʻnikmalarini mustahkamlash hamda xalqaro hamkorlikni kengaytirishga qaratilgan tashabbuslar ijobiy baholandi.
Muhokamalar yakunida oliy taʼlim tizimida boshlangan islohotlarni izchil davom ettirish, har bir oliygohni oʻz yoʻnalishi va hududiy ixtisoslashuvidan kelib chiqqan holda rivojlantirish, shu orqali raqobatbardosh kadrlar tayyorlashni taʼminlash asosiy maqsad sifatida belgilandi.