Oliygohlarning yil yakunlari va kelgusi ustuvor vazifalariga bagʻishlangan navbatdagi taqdimotlari oʻtkazildi
2025-12-23 18:00:00 / Vazirlik yangiliklari
Oliy taʼlim tashkilotlarida joriy yil davomida amalga oshirilgan islohotlar, erishilgan natijalar hamda 2026-yil uchun belgilangan ustuvor yoʻnalishlar yuzasidan navbatdagi tahliliy taqdimot boʻlib oʻtdi. 2025-yil 23-dekabr kuni tashkil etilgan mazkur tadbirda Oʻzbekiston Respublikasi Prezidenti Administratsiyasi rahbarining taʼlimni isloh qilish boʻyicha oʻrinbosari Hilola Umarova hamda Oliy taʼlim, fan va innovatsiyalar vazirining birinchi oʻrinbosari Sardor Rajabov ishtirok etdi.
Taqdimot davomida Toshkent shahridagi Xalqaro Vestminster universiteti, Toshkent shahridagi Inha universiteti, Toshkent shahridagi Singapur menejmentni rivojlantirish institute, Geologiya fanlari universiteti tomonidan oʻquv jarayonini takomillashtirish, ilmiy-tadqiqot faoliyatini rivojlantirish, xalqaro hamkorlikni kengaytirish hamda taʼlim sifatini oshirish borasida amalga oshirilgan ishlar yuzasidan batafsil maʼlumotlar taqdim etildi. Shuningdek, har bir muassasaning kelgusi yilga moʻljallangan strategik rejalari muhokama markazida boʻldi.
Xususan, Toshkent shahridagi Xalqaro Vestminster universiteti tomonidan taʼlim sifatini xalqaro standartlar asosida taʼminlash, akademik boshqaruvni takomillashtirish, talabalarni mehnat bozori talablariga mos kompetensiyalar bilan taʼminlash yoʻnalishida olib borilayotgan ishlar yuzasidan taqdimot qilindi. Universitetda taʼlim jarayonini natijaga yoʻnaltirilgan model asosida tashkil etish, ilmiy tadqiqotlarni amaliyot bilan uygʻunlashtirishga alohida eʼtibor qaratilgani qayd etildi.
Toshkent shahridagi Inha universiteti tomonidan axborot texnologiyalari, muhandislik va raqamli iqtisodiyot sohalarida kadrlar tayyorlash, ishlab chiqarish korxonalari bilan hamkorlikda amalga oshirilayotgan taʼlim dasturlari hamda startap va innovatsion loyihalarni qoʻllab-quvvatlash boʻyicha amalga oshirilayotgan ishlar muhokama qilindi. Universitetning taʼlimni sanoat bilan integratsiyalashtirishga qaratilgan yondashuvi alohida eʼtirof etildi.
Toshkent shahridagi Singapur menejmentni rivojlantirish instituti esa boshqaruv, biznes va inson resurslarini rivojlantirish sohalarida taʼlim dasturlarini yangilash, xalqaro tajribaga asoslangan oʻquv modellarini joriy etish hamda akademik mobillikni kengaytirishga qaratilgan ustuvor vazifalarini taqdim etdi. Taʼlim jarayonida amaliy koʻnikmalarni shakllantirishga yoʻnaltirilgan yondashuv institutsional ustuvorlik sifatida qayd etildi.
Geologiya fanlari universiteti tomonidan geologiya, yer qaʼri boyliklarini oʻrganish, sohaviy ilmiy tadqiqotlarni iqtisodiyot ehtiyojlari bilan bogʻlash, shuningdek, geologiya sohasida yuqori malakali mutaxassislar tayyorlash boʻyicha amalga oshirilayotgan ishlarga alohida toʻxtalib oʻtildi. Universitet ilmiy salohiyatini ishlab chiqarish va hududiy rivojlanish bilan uygʻunlashtirish masalalariga eʼtibor qaratdi.
Muhokamalar yakunida oliy taʼlim tashkilotlari tomonidan taqdim etilgan strategik rejalar milliy taʼlim siyosati, mehnat bozori ehtiyojlari hamda ilmiy-innovatsion taraqqiyot ustuvorliklari bilan uygʻun holda amalga oshirilishi zarurligi taʼkidlandi. Shuningdek, taʼlim sifatini oshirish, xalqaro raqobatbardosh kadrlar tayyorlash va universitetlarning institutsional salohiyatini yanada mustahkamlash kelgusi yil uchun asosiy vazifalar sifatida belgilab olindi.