O‘zbekiston Respublikasi Oliy taʼlim, fan va innovatsiyalar vazirligi

Mazkur tadbirda vazirlikning masʼul xodimlari, Jamoatchilik kengashi aʼzolari, fuqarolik jamiyati institutlari vakillari, oliy va kasbiy taʼlim muassasalari mutaxassislari, talabalar hamda ommaviy axborot vositalari ishtirok etdi.

Jamoatchilik eshituvini kirish so‘zi bilan Oliy taʼlim, fan va innovatsiyalar vaziri Qo‘ng‘irotboy Sharipov ochib berdi. Vazir oʻz nutqida, avvalo, vazirlik tomonidan 2025-yil davomida Oʻzbekiston Respublikasi Prezidenti, Prezident Administratsiyasi rahbari hamda Hukumat hujjatlarida belgilangan topshiriqlar ijrosi, oliy taʼlim va ilm-fan sohasida amalga oshirilgan ishlar toʻgʻrisida maʼlumot berdi.

2025-yilda Oliy taʼlim, fan va innovatsiyalar vazirligi tomonidan “Ijro.gov.uz” axborot tizimi orqali Oʻzbekiston Respublikasi Prezidenti, Prezident Administratsiyasi rahbari hamda Hukumat hujjatlarida belgilangan topshiriqlar ijrosi izchil va tizimli ravishda taʼminlandi.

Hisobot davrida vazirlikka “Ijro.gov.uz” tizimi orqali Oʻzbekiston Respublikasi Prezidentining 472 ta hujjati kelib tushdi. Shundan 82 tasi Prezident farmoni, 280 tasi Prezident qarori, 7 tasi Prezident farmoyishi va 103 tasi esa Prezident yig‘ilishlari bayonlari hisoblanadi.

Mazkur hujjatlarda Oliy taʼlim, fan va innovatsiyalar vazirligiga jami 2 511 ta topshiriq yuklatilgan bo‘lib, shundan Prezident farmonlari doirasida ­– 445 ta, Prezident qarorlari bo‘yicha – 1 779 ta, Prezident farmoyishlari asosida – 21 ta, Prezident yig‘ilishlari bayonlari bo‘yicha esa – 266 ta topshiriq belgilangan.

Shuningdek, 2025-yil davomida vazirlikka Oʻzbekiston Respublikasi Prezidenti Administratsiyasi rahbarining 56 ta hujjati kelib tushgan bo‘lib, ularning 45 tasi rezolyutsiyalardan iborat. Mazkur hujjatlar doirasida vazirlikka 134 ta topshiriq belgilangan.

Shu bilan birga, “Ijro.gov.uz” tizimi orqali 2025-yilda Oʻzbekiston Respublikasi Hukumatining 480 ta hujjati vazirlikka kelib tushdi. Ulardan 73 tasi Vazirlar Mahkamasi qarorlari hisoblanadi. 

Umuman olganda, 2025-yil davomida Oliy taʼlim, fan va innovatsiyalar vazirligi tomonidan “Ijro.gov.uz” tizimi orqali kelib tushgan Prezident, Prezident Administratsiyasi rahbari va Hukumat topshiriqlarining asosiy qismi o‘z vaqtida va sifatli ijro etildi. Bu esa vazirlik faoliyatida ijro intizomi, masʼuliyat va tizimli yondashuv ustuvor ekanini yana bir bor tasdiqlaydi.

Bugungi kunda vazirlik tomonidan qabul qilinayotgan normativ-huquqiy hujjatlar va ichki qarorlar monopoliyaga qarshi qonunchilik talablariga muvofiqligi nuqtayi nazaridan tizimli ravishda tahlil qilib borilayotgani bildirildi.

Shuningdek, Q. Sharipov nogironligi bo‘lgan shaxslarning taʼlim olish huquqini taʼminlash, oliy taʼlim tizimida inklyuziv muhitni shakllantirish davlat siyosatining ustuvor yo‘nalishlaridan biri ekanini qayd etdi.

Maʼlumotlarga ko‘ra, 2025-yilda I–II guruh nogironligi bo‘lgan abituriyentlar uchun 3 907 ta qo‘shimcha davlat granti kvotasi ajratilib, 3 258 nafar yoshlar oliy taʼlim muassasalariga talabalikka tavsiya etilgan. Shuningdek, ko‘zi ojiz abituriyentlar uchun alohida kirish imtihonlari tashkil etilgani, magistraturaga qabul jarayonida ayrim toifadagi fuqarolar uchun xorijiy til sertifikati talabi bekor qilingani inklyuziv taʼlimni rivojlantirishga qaratilgan muhim islohotlar sifatida eʼtirof etildi.

Jamoatchilik eshituvi davomida O‘zbekiston Nogironlar assotsiatsiyasi vakillari, oliy taʼlim muassasalarida tahsil olayotgan talabalar hamda ilmiy tadqiqotchilar tomonidan inklyuziv taʼlim amaliyoti, mavjud muammolar va ularni bartaraf etish bo‘yicha aniq taklif va tavsiyalar bildirildi.

Muhokamalar chog‘ida oliy taʼlim muassasalari infratuzilmasini inklyuziv talablarga moslashtirish, talabalar turar joylarida sharoitlarni yaxshilash, inklyuziv taʼlim bo‘yicha malakali kadrlar tayyorlash, shuningdek, raqamli va innovatsion yechimlarni keng joriy etish masalalariga alohida eʼtibor qaratildi.

Jamoatchilik eshituvi yakunida oliy va kasbiy taʼlim tizimida barcha uchun teng, qulay va ochiq taʼlim muhitini yaratish bo‘yicha bildirilgan taklif va tavsiyalar umumlashtirilib, inklyuziv taʼlimni yanada rivojlantirish yuzasidan tegishli idoralarga kiritilishi belgilandi.