Toshkentda Oʻzbekiston–Xitoy energetika sohasida “yashil” transformatsiyaga bagʻishlangan xalqaro ilmiy-amaliy seminar oʻtkaziladi
2025-12-20 14:00:00 / Vazirlik yangiliklari
Seminar INNO innovatsion oʻquv-ishlab chiqarish texnoparki tashabbusi bilan Xitoy Xalq Respublikasining yetakchi oliy taʼlim muassasalari, ilmiy markazlari hamda energetika sohasida faoliyat yuritayotgan yirik xalqaro kompaniyalar ishtirokida tashkil etildi. Unda qayta tiklanuvchi energiya, “yashil” transformatsiya, barqaror rivojlanish, zamonaviy energiya tizimlari, elektrlashtirilgan transport hamda energetika sohasi uchun yuqori malakali kadrlar tayyorlash masalalari muhokama qilindi.
Tadbirda Xitoy muhandislik akademiyasi akademigi, Jahon elektromobil assotsiatsiyasi asoschisi va prezidenti professor S.S. Chan, Xitoyning yetakchi universitetlari va ilmiy markazlari vakillari, shuningdek, Global Energy Interchonnechtion, China Energy Engineering Group, Datang Overseas Investment, NARI Technology, Beijing Sifang Automation kabi xalqaro kompaniyalar ekspertlari ishtirok etdi.
Seminardan koʻzlangan asosiy maqsad — INNO texnoparki hududida tashkil etilishi rejalashtirilayotgan “Past uglerodli energiya va elektrlashtirilgan transport boʻyicha xalqaro laboratoriya” faoliyati uchun ilmiy va tashkiliy asoslarni yaratish, shuningdek, ilm-fan, taʼlim va sanoat oʻrtasidagi hamkorlikni mustahkamlashdan iborat.
Seminar qayta tiklanuvchi energiya va past uglerodli texnologiyalar boʻyicha qoʻshma ilmiy tadqiqotlar yoʻlga qoʻyilishi, energiya tizimlarini raqamlashtirish va optimallashtirishga qaratilgan innovatsion yechimlar ishlab chiqilishi, xalqaro grant va investitsiyalarni jalb etish boʻyicha yangi imkoniyatlar yaratilishiga xizmat qiladi.