Misr elchisi bilan Dunyo arabshunoslari global forumini o‘tkazish masalalari muhokama qilindi
2024-05-08 15:10:00 / Vazirlik yangiliklari
Uchrashuv davomida sohada ikki tomonlama hamkorlik aloqalari yuzasidan fikr almashilib, uni yanada mustahkamlash bo‘yicha o‘zaro takliflar ko‘rib chiqildi.
“Misr va O‘zbekiston o‘rtasida ta’lim va ilm-fan sohasidagi hamkorligimiz faqat arab tili va adabiyotini o‘rganish bilan cheklanib qolmasligi kerak. Aloqalarni kengaytirish uchun har ikkala tomonda ham ishga solinmagan katta salohiyat bor”, – dedi elchi A. Fahmiy.
Shuningdek, elchi Misrning yetakchi universitetlari tomonidan O‘zbekistonda yangi oliy ta’lim muassasasini tashkil qilish imkoniyati borligini ma’lum qildi.
Vazir Q. Sharipov Misr bilan ta’limning muhandislik-texnika, suv resurslaridan unumli foydalanish, energetika sohalari bo‘yicha hamkorlikni yo‘lga qo‘yishdan manfaatdor ekanini ta’kidladi.
Bundan tashqari, tomonlar suhbat davomida 2024-yil 18–22-noyabr kunlari Toshkentda o‘tkazilishi rejalashtirilgan Dunyo arabshunoslari global forumi bilan bog‘liq tashkiliy masalalarni muhokama qildilar.