O‘zbekiston Respublikasi Oliy taʼlim, fan va innovatsiyalar vazirligi

Uchrashuv davomida ikki mamlakat o‘rtasida ilm-fan va ilmiy tadqiqotlar sohasida hamkorlikni yanada rivojlantirish, qo‘shma ilmiy loyihalarni amalga oshirish, akademik mobillikni kengaytirish hamda yosh olimlarni qo‘llab-quvvatlash masalalari muhokama qilindi.

Uchrashuvda O‘zbekiston Respublikasi Oliy ta’lim, fan va innovatsiyalar vazirligi hamda Yaponiya Fanni qo‘llab-quvvatlash jamiyati o‘rtasida imzolanishi kutilayotgan hamkorlik memorandumi ikki mamlakat ilmiy hamjamiyatlari o‘rtasida uzoq muddatli va tizimli hamkorlik uchun mustahkam institutsional asos yaratishi qayd etildi.

Shuningdek, hamkorlik doirasida o‘zbek tadqiqotchilarining yetakchi yapon universitetlari va ilmiy markazlarida ilmiy izlanishlar olib borishi, qo‘shma seminarlar, ilmiy anjumanlar, qisqa va o‘rta muddatli stajirovkalar tashkil etish imkoniyatlari muhokama qilindi. Ayniqsa, doktorantlar, magistrantlar va yosh olimlar uchun xalqaro ilmiy amaliyotlarga keng yo‘l ochish muhimligi ta’kidlandi.

O‘z navbatida, mazkur hamkorlik Yaponiya olimlari uchun Markaziy Osiyo, jumladan O‘zbekiston hududida qo‘shma ilmiy tadqiqotlar olib borish, mintaqaviy ilmiy loyihalarda ishtirok etish imkoniyatini kengaytiradi.

Uchrashuv yakunida tomonlar O‘zbekiston va Yaponiya o‘rtasida ilm-fan sohasidagi hamkorlik o‘zaro manfaatli, barqaror va uzoq muddatli tus olishiga ishonch bildirib, ochiq va konstruktiv muloqotni davom ettirishga tayyor ekanliklarini qayd etdilar.