Inklyuziv taʼlim masalalari boʻyicha ochiq muloqot: yoshlar tashabbuslari eshitildi
2025-12-18 18:40:00 / Vazirlik yangiliklari
18-dekabr kuni Oliy taʼlim, fan va innovatsiyalar vazirligida “VoiceUp” inklyuziv yoshlar oromgohi ishtirokchilari bilan ochiq muloqot va uchrashuv tashkil etildi. Tadbirda vazir maslahatchisi A. Meliboyev ishtirok etib, mamlakatimizda inklyuziv taʼlim sohasida amalga oshirilayotgan ishlar, bu borada mavjud muammolar hamda kelgusidagi ustuvor yoʻnalishlar xususida oʻz fikr va mulohazalarini bildirdi.
Uchrashuv davomida ishtirokchilar tomonidan inklyuziv taʼlim infratuzilmasini yanada takomillashtirish, taʼlim muassasalarida arxitekturaviy moslashuvni taʼminlash, raqamli taʼlim resurslaridan foydalanish imkoniyatlarini kengaytirish, shuningdek, pedagog kadrlarni inklyuziv kompetensiyalarga ega etish masalalari yuzasidan qator amaliy taklif va tavsiyalar ilgari surildi. Shu bilan birga, nogironligi boʻlgan yoshlarning ovozini eshitish, ularni qaror qabul qilish jarayonlariga faol jalb etish muhimligi alohida taʼkidlandi.
Uchrashuv qizgʻin savol-javoblar, konstruktiv mulohazalar va aniq takliflar ruhida oʻtib, ishtirokchilar hamda masʼul tashkilot vakillari oʻrtasida ochiq muloqotni yanada mustahkamlashga xizmat qildi. Bunday tadbirlar inklyuziv siyosatni samarali amalga oshirish, yoshlar tashabbuslarini qoʻllab-quvvatlash hamda taʼlim tizimida barqaror va adolatli islohotlarni taʼminlashda muhim ahamiyat kasb etadi.