O‘zbekiston Respublikasi Oliy taʼlim, fan va innovatsiyalar vazirligi

Uchrashuv davomida tomonlar ilm-fan, innovatsiyalar va texnologiyalar sohalarida o‘zaro hamkorlikni yanada kengaytirish, qo‘shma ilmiy tadqiqot loyihalarini amalga oshirish, ilg‘or texnologiyalarni joriy etish, ilmiy salohiyatni oshirish, shuningdek, olimlar va mutaxassislar o‘rtasida tajriba almashinuvini yo‘lga qo‘yish masalalarini muhokama qildilar.

Muzokaralar chog‘ida ikki tomonlama hamkorlikni jadallashtirish, innovatsion ishlanmalarni qo‘llab-quvvatlash, yosh olimlar va tadqiqotchilarni rag‘batlantirish, shuningdek, ilm-fan yutuqlarini iqtisodiyot tarmoqlariga tatbiq etish bo‘yicha istiqbolli yo‘nalishlar belgilab olindi.

Uchrashuv yakunida Oliy ta’lim, fan va innovatsiyalar vazirligi hamda Yaponiya Fan va texnologiyalar agentligi (JST) o‘rtasida ilm-fan, innovatsiyalar va texnologiyalar sohalarida xalqaro hamkorlikni mustahkamlashga qaratilgan Hamkorlik memorandumi imzolandi.

Memorandum doirasida quyidagi muhim natijalarga erishish ko‘zda tutilgan:

Yaponiyaning ilg‘or texnologiyalari va ilmiy maktablariga keng kirish imkoniyati
– JST ko‘magida Yaponiyaning yetakchi ilmiy laboratoriyalari, universitetlari va ilmiy-tadqiqot (R&D) markazlari bilan to‘g‘ridan-to‘g‘ri hamkorlik yo‘lga qo‘yiladi.

Qo‘shma ilmiy tadqiqotlar va texnologik ishlanmalarni rivojlantirish
– Muhandislik, biotexnologiya, qishloq xo‘jaligi, energetika, materialshunoslik va boshqa ustuvor yo‘nalishlarda qo‘shma ilmiy-tadqiqot loyihalarini amalga oshirish imkoniyati yaratiladi.

Yosh olimlar va tadqiqotchilar uchun almashinuv hamda malaka oshirish dasturlari
– Yaponiyada ilmiy stajirovkalar, qo‘shma seminarlar, treninglar va akademik almashinuv dasturlari orqali yosh kadrlarning ilmiy va innovatsion salohiyati sezilarli darajada oshiriladi.

Ilmiy boshqaruv va ilm-fan siyosatini takomillashtirish
– JSTning innovatsion boshqaruv modeli, grant tizimlari, loyihalarni baholash mexanizmlari hamda ilmiy ekotizimni rivojlantirish bo‘yicha ilg‘or tajribasi O‘zbekistonda amaliyotga joriy etiladi.

Xalqaro ilmiy tarmoqlarga integratsiyalashuv
– JST ishtirokidagi global konsorsiumlar orqali O‘zbekiston olimlari xalqaro ilmiy tarmoqlar, qo‘shma konsorsiumlar, nufuzli grant dasturlari va xalqaro reytinglarda faol ishtirok etish imkoniyatiga ega bo‘ladi.