Oliy ta’lim muassasalari faoliyati va 2026-yil ustuvor yo‘nalishlari muhokama qilindi
2025-12-16 15:00:00 / Vazirlik yangiliklari
Muhokamada Toshkent davlat agrar universiteti, Toshkent davlat yuridik universiteti, O‘zbekiston davlat jismoniy tarbiya va sport universiteti, O‘zbekiston davlat san’at va madaniyat instituti hamda Guliston davlat universiteti rahbarlari o‘z ta’lim muassasalarining 2025 yilgi faoliyati yakunlari, erishilgan natijalar va istiqboldagi ustuvor vazifalar yuzasidan taqdimotlar bilan ishtirok etdi.
Xususan, Toshkent davlat agrar universitetida qishloq xo‘jaligi sohasida ilmiy tadqiqotlarni amaliyot bilan uyg‘unlashtirish, innovatsion agrotexnologiyalarni joriy etish va zamonaviy mutaxassislar tayyorlash borasida olib borilayotgan ishlar ko‘rib chiqildi. Toshkent davlat yuridik universiteti faoliyatida esa huquqiy ta’lim sifatini oshirish, raqamli huquq, xalqaro va iqtisodiy huquq yo‘nalishlarida yangi dasturlarni joriy etish masalalariga alohida e’tibor qaratildi.
Shuningdek, O‘zbekiston davlat jismoniy tarbiya va sport universitetida sport sohasi uchun yuqori malakali kadrlar tayyorlash, sport ilmi va tibbiyotini rivojlantirish, xalqaro reyting va musobaqalardagi ishtirokni kengaytirish bo‘yicha amalga oshirilayotgan tashabbuslar muhokama qilindi. O‘zbekiston davlat san’at va madaniyat institutida esa milliy va jahon madaniy merosini uyg‘unlashtirgan holda ijodiy ta’limni rivojlantirish, san’at ta’limida zamonaviy yondashuvlarni joriy etish masalalari yuzasidan fikr almashildi.
Guliston davlat universiteti faoliyati doirasida hududiy rivojlanishga xizmat qiluvchi ilmiy yo‘nalishlari, kadrlar tayyorlash sifati, ilmiy salohiyatni oshirish va universitetning ilmiy markaz sifatidagi o‘rnini mustahkamlashga qaratilgan rejalar muhokama etildi.
Uchrashuv davomida 2026-yilda oliy ta’lim muassasalarida o‘quv jarayonini yanada takomillashtirish, ilmiy-tadqiqot va innovatsion faoliyatni kuchaytirish, bozor talablariga mos raqobatbardosh mutaxassislar tayyorlash hamda universitetlar boshqaruvida samaradorlikni oshirish bo‘yicha ustuvor vazifalar belgilab olindi.