Xitoyning TANG kompaniyasi bilan hamkorlikda kasbiy ta’limni rivojlantirish bo‘yicha rejalar belgilandi
2025-12-11 11:20:00 / Vazirlik yangiliklari
Tadbir O‘zbekiston Respublikasi Prezidenti Shavkat Mirziyoyev va XXR Raisi Si Szinpin o‘rtasidagi strategik kelishuvlar doirasida ta’lim va inson kapitalini rivojlantirish bo‘yicha belgilangan ustuvor yo‘nalishlarni amaliyotga tatbiq etishning navbatdagi bosqichi sifatida o‘tkazildi. O‘zbekiston–Xitoy hamkorligida so‘nggi yillarda qo‘shma ta’lim dasturlari, ustaxonalar, raqamli platformalar va pedagogik texnologiyalarni joriy etish bo‘yicha sezilarli natijalarga erishilgani qayd etildi.
Uchrashuv davomida TANG kompaniyasining xalqaro tajribasi hamda kompaniya tomonidan taklif etilayotgan quyidagi hamkorlik yo‘nalishlari muhokama qilindi:
- texnik yo‘nalishlarda 2+1 va 2+2 modellari asosida qo‘shma “ikki diplomli” ta’lim dasturlari;
- qisqa muddatli amaliy o‘quv kurslari;
- raqamli xitoy tili ta’limi platformasini joriy etish;
- pedagog kadrlarni tayyorlash va malaka oshirish dasturlari;
- kasbiy malakalarni sertifikatlash tizimi;
- texnik va kasbiy ta’lim uchun raqamli o‘quv resurslarini yaratish va tatbiq etish.
Shuningdek, uchrashuvda Xitoy–O‘zbekiston sanoat va texnik- kasbiy ta’lim sohasidagi hamkorlik bo‘yicha Ilg‘or tajriba markazini tashkil etish tashabbusi ko‘rib chiqildi. Vazirlik mazkur yo‘nalishlarda TANG kompaniyasi bilan yaqin hamkorlikni yo‘lga qo‘yishga tayyorligini bildirdi. Jumladan, dastlabki bosqichda 5 ta texnikum bazasida pilot loyihalarni amalga oshirish hamda qo‘shma ustaxonalarni tashkil etish rejalashtirilmoqda.
Uchrashuv yakunida tomonlar istiqboldagi qo‘shma loyihalar bo‘yicha amaliy ishlarni jadallashtirishga kelishib oldilar.