Vazirlik tizimida gender tenglik siyosati ijrosi bo‘yicha yig‘ilish bo‘lib o‘tdi
2025-11-27 17:20:00 / Vazirlik yangiliklari
Tadbirda xotin-qizlarning jamiyatdagi o‘rni va nufuzini oshirish, gender tenglikni ta’minlash hamda oila instituti barqarorligini mustahkamlashga qaratilgan davlat siyosati doirasida ko‘rilayotgan chora-tadbirlar muhokama qilindi.
Yig‘ilish xotin-qizlarning jamiyatdagi rolini oshirish, gender tenglikni ta’minlash maqsadida tashkil etilgan bo‘lib, unda vazirlik va uning tizim tashkilotlarida gender auditini o‘tkazish vazifalari belgilab olindi.
25-noyabridan boshlab Oliy ta’lim, fan va innovatsiyalar vazirligi hamda tizim tashkilotlari faoliyati gender auditi o‘tkazilmoqda. Gender audit O‘zbekiston kasaba uyushmalari Federatsiyasi tomonidan ishlab chiqilgan metodika asosida amalga oshirilmoqda. Jarayon doirasida vazirlik tizimida bir qator muhim yo‘nalishlar o‘rganilmoqda. Jumladan, xodimlar uchun yaratilgan mehnat sharoitlari, rahbarlik lavozimlarida ayollar ulushi va kadrlar siyosatining gender mutanosibligi tahlil qilinmoqda. Shu bilan birga, ta’lim va ilmiy jarayonlarda teng imkoniyatlar yaratilgani, gender stereotiplarini kamaytirish hamda diskriminatsiya holatlarining oldini olish bo‘yicha amalga oshirilayotgan ishlar, shuningdek, ayollarning qaror qabul qilish jarayonlaridagi ishtiroki ham kompleks tarzda baholanishi ko‘zda tutilgan.
Yig‘ilishda vazir Q. Sharipov oliy ta’lim tizimida gender tenglikni ta’minlash, xotin-qizlarni qo‘llab-quvvatlash va ular uchun munosib mehnat va ta’lim sharoitlari yaratish bo‘yicha amalga oshirilayotgan islohotlar, erishilayotgan natijalar va dolzarb muammolar haqida atroflicha ma’lumot berdi.
Ta’kidlanishicha, gender audit natijalari asosida tizimdagi normativ-huquqiy bazani takomillashtirish, ichki tartib-qoidalarni qayta ko‘rib chiqish, shuningdek, profilaktik va ma’rifiy ishlar samaradorligini oshirishga qaratilgan taklif va tavsiyalar ishlab chiqiladi.
Mazkur jarayon Oliy ta’lim, fan va innovatsiyalar vazirligi tizimida xotin-qizlar manfaatlarini himoya qilishni yanada kuchaytirish, gender tenglikning xalqaro tajriba va standartlariga mos mexanizmlarni joriy etish orqali ijtimoiy adolat va barqaror taraqqiyotga xizmat qiladi.