QS tashkiloti bilan aloqalarni yanada mustahkamlash masalalari muhokama qilindi
2025-11-26 17:15:00 / Vazirlik yangiliklari
Uchrashuvda O‘zbekiston Respublikasi Prezidenti Administratsiyasi huzuridagi Ta’lim sifatini ta’minlash milliy agentligi direktori Baxtiyor Yo‘ldoshev ham ishtirok etdi.
Uchrashuvda Central Asian Universitetida o‘tkazilgan QS Eurasia Forum 2025 natijalari muhokama qilindi. Forumning mamlakatimiz uchun ahamiyati, xususan, hamkorlikni yanada mustahkamlash, O‘zbekiston oliy ta’lim muassasalarining global miqyosdagi tan olinishi va raqobatbardoshligini oshirishga xizmat qilayotgani alohida ta’kidlandi.
Qayd etilishicha, so‘nggi yillarda QS bilan hamkorlik izchil rivojlanib bormoqda. Tashkilot tomonidan taqdim etilayotgan strategik maslahatlar, treninglar va metodik ko‘mak O‘zbekiston universitetlarining xalqaro reytinglardagi o‘sishida muhim rol o‘ynamoqda. Buning yaqqol isboti sifatida, QS World University Rankings 2026 natijalarida mamlakatning yetti oliygohi qayd etilgani, ulardan beshtasining ilk bor kiritilgani, uchta universitetning esa dunyoning birinchi 1000 talik ro‘yxatidan o‘rin olgani qayd etildi.
Uchrashuvda kelgusi yilda QS Eurasia Forum’ni yanada keng qamrovli, ikki kunlik formatda tashkil etish tashabbusi ilgari surildi. Shuningdek, hamkorlikning istiqboldagi bir qator yo‘nalishlari yuzasidan fikr almashildi. Jumladan, universitetlarni birlashtirish jarayoni sharoitida ularning reytinglarda ishtirok etish istiqbollari, oliygohlarning reytingdagi o‘rnini yaxshilashga qaratilgan ustuvor vazifalar hamda yangi hamkorlik shartnomasi doirasida taqdim etiladigan xizmatlar hajmini kengaytirish imkoniyatlari muhokama qilindi.
Uchrashuv yakunida QS Eurasia Forum 2025 tadbirini o‘tkazishdagi faol ishtiroki uchun Oliy ta’lim, fan va innovatsiyalar vazirligiga QS tomonidan minnatdorlik sertifikati topshirildi.