O‘zbekiston Respublikasi Oliy taʼlim, fan va innovatsiyalar vazirligi

1. Professional taʼlim tashkilotining pedagog kadrlari necha yilda majburiy attestatsiyadan oʻtkaziladi?

Oʻzbekiston Respublikasi Vazirlar Mahkamasining 572-son qaroriga muvofiq pedagog kadrlar har besh yilda bir marta navbatdagi majburiy attestatsiyadan oʻtkaziladi.

2. Universitetni tugatib texnikumda oʻqituvchi boʻlib ishlayotganimga 6 oy boʻldi, men bu yili oʻtkaziladigan attestatsiya imtihonlariga qatnasha olamanmi?

Nizomga koʻra, ilgari attestatsiyadan oʻtmagan ishga yangi qabul qilingan pedagog kadrlarga yoki oliy taʼlim tashkilotlarini bitirib birinchi bor ishga kirgan pedagog kadrlar kasbiy faoliyatiga uch yil toʻlgandan soʻng navbatdagi majburiy attestatsiyadan oʻtkaziladi.

Ammo, pedagog kadrlar oʻz xohishiga koʻra (ixtiyoriy) navbatdan tashqari attestatsiyadan oʻtkazilishi mumkin.

3. Oliy toifali oʻqituvchiman 15 yildan beri fizika fanidan akademik litseyda dars beraman, bu yil oʻtkaziladigan majburiy attestatsiyada qatnashishim kerakmi?

Amaldagi Nizomga muvofiq oliy malaka toifani 15 yil davomida saqlab kelgan va uzluksiz ish stajiga ega boʻlgan pedagog kadrlar majburiy attestatsiyaga jalb etilmaydi.

Bundan tashqari, fan nomzodi, falsafa doktori yoki fan doktori darajasiga hamda Oliy attestatsiya komissiyasi tomonidan berilgan katta ilmiy xodim, dotsent va professor ilmiy unvoniga ega boʻlgan pedagog kadrlar ham majburiy attestatsiyaga jalb etilmaydi. Ammo ixtiyoriy navbatdan tashqari attestatsiyada qatnashishlari mumkin. Attestatsiyada salbiy natija qayd etilgan taqdirda, oldin amalda boʻlgan malaka toifasi (lavozimi) saqlab qolinadi.

4. Akademik litseyda oliy toifali oʻqituvchi boʻlib ishlayman, tugʻruq taʼtildan chiqqanimga 4 oy boʻladi, bu yil oʻtkaziladigan attestatsiya imtihonlariga qatnasha olamanmi?

Nizomga koʻra, homiladorlik va tugʻish hamda bolani parvarish qilish taʼtillarida boʻlgan ayollar, ular taʼtilda boʻlgan davrda hamda ishga chiqqanidan keyin bir yil davomida attestatsiya imtihoniga majburiy jalb etilmaydi. Yaʼni, majburiy jalb etilmaysiz, ammo ixtiyoriy qatnashishingiz mumkin.

5. Kasb-hunar maktabida oʻqituvchi boʻlib ishlayman, majburiy attestatsiya imtihonidan oʻtganimga 2 yil boʻladi, oʻz xohishimga koʻra navbatdan tashqari attestatsiya imtihonlariga qatnashishim mumkinmi va bu malaka toifamga taʼsir qilmaydimi?

Javob: Ha albatta, qatnashishingiz mumkin. Nizomga koʻra navbatdagi majburiy attestatsiyaga jalb etilmaydigan pedagog kadrlarning amaldagi malaka toifalari saqlanib qoladi hamda ularga taʼlim tashkilotlarida ishlagan davrida mazkur malaka toifasi boʻyicha haq toʻlanadi.

Oʻz xohishiga koʻra navbatdan tashqari attestatsiyada qatnashib, malaka toifasini oshirgan yoki saqlab qolgan pedagog kadrlarga oshirilgan yoki saqlab qolingan malaka toifasi boʻyicha haq toʻlanadi.

6. Universitetni tugatib bu yil akademik litseyga oʻqituvchi boʻlib ishga kirdim, attestatsiya imtihonlariga qatnashishimga qadar menga qanday malaka toifasi beriladi?

Ilgari attestatsiyadan oʻtmagan ishga yangi qabul qilingan pedagog kadrlarga yoki oliy taʼlim tashkilotlarini bitirib birinchi bor ishga kirgan pedagog kadrlarga attestatsiyaga jalb etilgunga qadar mutaxassis malaka toifasi beriladi.

7. Oliy toifali oʻqituvchiman. 2 ta joyda ishlayman. Asosiy ishim akademik litseyda, maktabda oʻrindosh sifatida dars ham beraman. Asosiy ish joyimdan attestatsiyadan oʻtaganman, qoʻshimcha ish joyimdan ham oʻtishim kerakmi?

Nizomga koʻra, pedagog kadrlar asosiy ish joyi boʻyicha attestatsiyaga jalb etiladi. Taʼlim tashkilotlarida oʻrindoshlik asosida dars beradigan va asosiy ish joyi boʻyicha pedagogik faoliyat bilan shugʻullanmaydigan pedagog kadrlar oʻrindoshlik asosida faoliyat yuritayotgan taʼlim tashkilotidan attestatsiyaga jalb etiladi. Siz holatingizda, asosiy ish joyingizdan attestatsiyadan oʻtgan boʻlsangiz oʻrindoshlik asosidagi ish joyidan attestatsiyadan oʻtish talab etilmaydi.

8. Pedagoglarning attetatsiyadan oʻtkazish yilda necha marotaba boʻladi?

Akademik litsey hamda professional taʼlim muassasalarining pedagog kadrlari uchun malaka sinovlari har yili mart — may hamda oktyabr — noyabr oylarida Oliy taʼlim, fan va innovatsiyalar vazirligi tomonidan oʻtkaziladi.

Maʼlumot oʻrnida joriy yil 1-martga qadar belgilangan tartibda murojaat qilgan pedagog kadrlar uchun ikkinchi bosqich (test) imtihonlari may oyida oʻtkazilishi rejalashtirilgan. Test oʻtkazilish sanasi haqida qoʻshimcha vazirlikning veb-sayti hamda @eduuz ijtimoiy tarmoqlari orqali xabar beriladi.

9. Attestatsiya qanday shaklda oʻtkaziladi? Tartibi, baholash mezonlari haqida batafsil maʼlumot berolasizmi?

Akademik litsey hamda professional taʼlim muassasalarining pedagog kadrlarini attestatsiyadan oʻtkazish ikki bosqichda amalga oshiriladi hamda ikkita bosqich boʻyicha umumiy 100 ballik tizimda baholanadi:

birinchi bosqichda — pedagog kadrning pedagogik mahorati va psixologik tayyorgarligi, ikkinchi bosqichda — oʻquv fani boʻyicha bilim darajasi baholanadi.

pedagogik mahorati va psixologik tayyorgarligi taʼlim tashkilotining pedagogik (kuzatuv) kengashlari tomonidan oʻrganiladi hamda mazkur Nizomga 5-ilovaga muvofiq baholash mezonlari asosida 20 ballik tizimda baholanadi.

pedagogning oʻquv fani boʻyicha bilim darajasini aniqlash uchun 40 ta test topshirigʻi beriladi. Har bir toʻgʻri bajarilgan test topshirigʻi 2 ball bilan baholanib, test sinovlari uchun jami 80 ball toʻplash mumkin.

Shuningdek, kamida S1 darajadagi milliy yoki unga mos darajadagi xalqaro sertifikatga ega chet (ingliz, fransuz, nemis, ispan, italyan, arab, xitoy, yapon, koreys, turk, fors, pushtu, dari, urdu, hind) tili fani oʻqituvchilariga navbatdagi majburiy attestatsiyada mutaxassislik fani va kasb standarti boʻyicha bilim darajasini aniqlash hamda oʻquv fani boʻyicha malaka sinovidan maksimal 80 ball beriladi hamda ular ushbu malaka sinovidan ozod etiladi.

Malaka sinovi natijalari sinov yakunlangan kundan boshlab bir haftadan kechikmasdan, Oliy taʼlim, fan va innovatsiyalar vazirligining rasmiy veb-sayti va ijtimoiy tarmoqlarida eʼlon qilinadi.

Pedagog kadr quyidagi hollarda malaka sinovlaridan chetlashtiriladi.:

sinov oʻtkazilayotgan auditoriyaga har qanday adabiyot, shpargalka yoki telekommunikatsiya va texnika vositalarini olib kirsa;

sinov oʻtkazilayotgan vaqtda boshqa ishtirokchilar bilan muloqot qilsa;

savollarni koʻchirib olishga hamda sinov materiallarini auditoriyadan olib chiqishga harakat qilsa;

sinov materiallarini boshqa talabgorlarga bersa, sinovni oʻtkazish jarayoniga xalaqit qilsa;

sinov jarayoniga boshqa talabgorning oʻrniga kirganligi aniqlansa;

sinovlar uchun ajratilgan vaqt tugagandan soʻng sinov materiallarini topshirishdan bosh tortsa;

sinovlar jarayonida videokuzatuvlar orqali talabgorning tartib va qoidalarga amal qilmasa.

10. Attestatsiya natijalaridan norozi boʻlgan talabgor, kimga qay tartibda murojaat qilishi kerak?

Attestatsiya natijalaridan norozi boʻlgan pedagog kadrlar natijalar eʼlon qilingan kundan boshlab oʻn kun mobaynida apellatsiya komissiyasiga yozma ravishda ariza berishlari mumkin.

Apellatsiya komissiyasi attestatsiya boshlangandan keyin oʻn kun ichida vakolatli vazirliklar rahbarlarining buyrugʻiga koʻra yetti kishidan iborat tarkibda tuziladi.

Apellatsiya komissiyasiga murojaat qilish yozma ravishda yoki vakolatli vazirlikning rasmiy veb-sayti orqali elektron tarzda amalga oshiriladi.

Ariza (shikoyat) roʻyxatga olingan kundan boshlab oʻn kun muddatda koʻrib chiqiladi va Apellatsiya komissiyasi qarori nusxasi murojaat etuvchi pedagog kadrga qaror chiqqan kundan eʼtiboran besh kun muddatda taqdim etiladi.

11. Oliy toifali oʻqituvchiman kasb–hunar maktabida men uzrli sabablarga koʻra majburiy attestatsiya imtihonlariga qatnasha olmadim, boshqa sanada borib imtihon topshirganda toʻlov talab qilinmaydimi?

Nizomga muvofiq, siz majburiy attestatsiya imtihonlariga toʻlov qilmaysiz. Toʻlov ixtiyoriy attestatsiya imtihonlarida talab qilinadi. Agar pedagog kadrlar uzrli sabablarga koʻra attestatsiyaga kelmaganligi tufayli ularning attestatsiyasi boshqa muddatga koʻchirilgan taqdirda, yigʻim takroran undirilmaydi.