TDT Bosh kotibi Toshkentdagi oliy taʼlim tashkilotlarida uchrashuvlar oʻtkazdi
2025-11-15 16:05:00 / Vazirlik yangiliklari
Turkiy davlatlar tashkiloti (TDT) Bosh kotibi Kubanichbek Omuraliyev Oʻzbekistonga tashrifi doirasida Toshkent davlat sharqshunoslik universiteti (TDSHU) hamda Toshkent xalqaro universitetiga tashrif buyurdi.
TDSHUga tashrif chogʻida Kubanichbek Omuraliyev universitet rektori Gulchehra Rixsiyeva bilan uchrashib, taʼlim sohasida hamkorlikni kengaytirish, turkiy mamlakatlar oʻrtasida akademik aloqalarni mustahkamlash masalalarini muhokama qildi. Tomonlar Turkiy universitetlar ittifoqining “Orxun” almashinuv dasturi doirasida qoʻshma loyihalar va dasturlarni yanada kengaytirish muhimligini taʼkidladi. Shundan soʻng Bosh kotib TDT doirasida hamkorlikning hozirgi holati va rivojlanish istiqbollari toʻgʻrisida maʼruza qildi.
Shuningdek, Bosh kotib K. Omuraliyev 2025–2026-yillarda Turkiy universitetlar ittifoqiga (TURKUNIB) raislik qilayotgan Toshkent xalqaro universitetiga tashrif buyurdi. Uchrashuvda mazkur universitet rektori Iskandar Yoʻldoshev bilan universitetning raislik faoliyatini samarali tashkil etish, turkiy davlatlar oliy taʼlim muassasalari oʻrtasida hamkorlikni yanada kuchaytirish masalalari muhokama qilindi.
Tashrif doirasida TURKUNIBʼning yangilangan rasmiy veb-sayti Bosh kotibga taqdim etildi va uni yaqin kunlarda ishga tushirish yuzasidan kelishuvga erishildi. Shuningdek, 2025-yil 15-oktyabr kuni TIUda TURKUNIBning VIII Bosh Assambleyasi oʻtkazilgani turkiy dunyoda taʼlim sohasidagi hamkorlikni yanada mustahkamlash yoʻlida muhim qadam boʻlgani qayd etildi.