O‘zbekiston Respublikasi Oliy taʼlim, fan va innovatsiyalar vazirligi

Yig‘ilishda oliy ta’lim muassasalarida ma’naviy-ma’rifiy ishlar samaradorligi va kuz–qish mavsumiga tayyorgarlik holati tanqidiy tahlil qilindi.

Vazir ta’lim muassasalari rahbarlari va tyutorlarning har bir talaba bilan ishlash, ijara uylarida yashovchi yoshlarning holidan muntazam xabardor bo‘lish zarurligini ta’kidladi. Talabalarga zarur sharoitlarni yaxshilash, jinoyatchilik va noxush holatlarning oldini olish maqsadida mas’ul tashkilotlar hamkorligini kuchaytirish topshirildi.

Hududlarda talabalar istiqomat qilayotgan xonadon va yotoqxonalar holatini o‘rganish, ularning yong‘in va sanitariya xavfsizligi talablariga muvofiqligini nazorat qilish, aniqlangan kamchiliklarni bartaraf etish bo‘yicha aniq choralar ko‘rish belgilandi.

Shuningdek, noyabr–dekabr oylarida barcha ta’lim tashkilotlarida “Xavfsizlik oyligi” o‘tkazilishi, “Gazdan xavfsiz foydalanish” mavzusida targ‘ibot ishlari olib borilishi, maxsus videorolik va eslatmalar tayyorlab, ularni ijtimoiy tarmoqlarda muntazam yoritish topshirildi.

Shu bilan birga, tyutorlar faoliyatini tahlil qilish, muammoni chuqur o‘rganish, yangi metodik yondashuvlar ishlab chiqish va xorijiy tajribalarni o‘rganish bo‘yicha vazifalar belgilandi.

Yig‘ilishda, shuningdek, ta’lim tashkilotlarida issiqlik tizimlarining uzluksiz ishlashi, kasbiy ta’lim muassasalarida qozonxona jihozlarini yangilash va ta’mirlash ishlarini yakuniga yetkazish, oliy ta’lim tashkilotlari moliyaviy barqarorligini ta’minlash, ish haqi, stipendiya va shartnoma to‘lovlarini o‘z vaqtida amalga oshirish yuzasidan aniq topshiriqlar berildi.