O‘zbekiston Respublikasi Oliy taʼlim, fan va innovatsiyalar vazirligi

Ochilish marosimida so‘zga chiqqanlar O‘zbekiston va Koreya o‘rtasidagi do‘stona hamkorlik, o‘qituvchilarning malakasini xalqaro standartlar asosida oshirish va ilg‘or o‘qitish metodikalarini joriy etishning muhim ahamiyatini ta’kidladilar. Shuningdek, dastur mamlakatda kasbiy ta’lim tizimini takomillashtirish, ta’lim sifatini oshirish va o‘qituvchilarning zamonaviy texnologiyalar bilan ishlash ko‘nikmalarini mustahkamlashga xizmat qilishi qayd etildi.

Treninglarda O‘zbekistonning 14 ta hududidan 314 nafar o‘qituvchi ishtirok etmoqda. Ular 11 ta kasb — Raqamli CNC tokarlik ishlari, Elektronika, Veb texnologiyalari, Nonvoylik (Pekar), Moda texnologiyasi, Soch turmaklash (Sartaroshlik) kabilar bo‘yicha koreyalik WorldSkills ekspertlari bilan amaliy mashg‘ulotlar olib bormoqda.

Ushbu treninglar 14-noyabr kuniga qadar davom etib, kasbiy ta’lim tizimi o‘qituvchilariga xalqaro tajribani o‘rganish, ilg‘or metodlarni ta’lim jarayoniga tatbiq etish va malakalarni baholashning zamonaviy yondashuvlarini o‘zlashtirish imkonini beradi.