“Ilm – eng buyuk sharaf”: Do‘stlikda so‘nggi qo‘ng‘iroq jarangladi
2025-05-24 10:35:00 / Yangiliklar
Mamlakatimizda an’anaga aylangan, har bir o‘quvchi hayotida o‘chmas taassurot qoldiradigan so‘nggi qo‘ng‘iroq – bu nafaqat ta’limning yakuni, balki yangi hayot bosqichiga qo‘yilgan ilk qadamdir. Do‘stlik tumanidagi barcha umumta’lim maktablarida ham bu yil “Ilm – eng buyuk sharaf” shiori ostida mazkur tadbir ko‘tarinki ruhda o‘tkazildi.
Ushbu ma’naviy-ma’rifiy tantanada bitiruvchilarning qalbida yuksak Vatanparvarlik, kelajakka ishonch, ustozlarga bo‘lgan samimiy minnatdorlik tuyg‘ulari yangradi. Maktab sahnalarida yangragan qo‘shiqlar, bitiruvchilar va kichik sinf o‘quvchilari o‘rtasidagi samimiy tilaklar, ustozlar so‘zlari har bir ishtirokchida faxr va hayajon uyg‘otdi.
Tuman maktablarida o‘tkazilgan tantanali tadbirlar avvalida Jizzax viloyati hokimi vazifasini bajaruvchi Ulug‘bek Mustafoyev mamlakatimiz rahbarining bitiruvchilarga yo‘llagan samimiy tabrigini o‘qib eshittirdi. Tabrik viloyat televideniyesi orqali to‘g‘ridan-to‘g‘ri namoyish etildi. Ushbu tabrikda yoshlarning kelajakda Vatanga sadoqatli, zamonaviy bilim va kasb egalari sifatida kamol topishlari yo‘lida bildirilgan tilaklar har bir yosh qalbida ezgu orzularni uyg‘otdi.
Do‘stlik tumani hokimi Shavkat Darvishev tumandagi 2-umumta’lim maktabida bo‘lib, bitiruvchilarni bayram bilan samimiy qutladi, ularga kelgusidagi o‘qish va mehnat faoliyatida ulkan zafarlar tiladi. U o‘quv yili davomida o‘zining faolligi, yutuqlari, namunaviy xulqi bilan alohida ajralib turgan bitiruvchi yoshlarni esdalik sovg‘alari bilan taqdirladi.
Ta’kidlash joizki, 2024-2025 o‘quv yilida tumanda jami 750 nafar 11-sinf bitiruvchilar tamomlamoqda.
O‘tgan 2024 yilda maktabni 723 nafar bitiruvchilardan 395 (55 %) nafar oliy ta’lim muassalarga o‘qishga qabul qilingan bo‘lsada 328 (45 %) nafari rasmiy va norasmiy bandligi ta’minlangan.
Maktab bitiruvchilaridan 6 nafari bu yil fanlar bo‘yicha milliy va xalqaro sertifikatlardan V2 darajadagi sertifikatlarni qo‘lga kiritib, muddatidan oldin talaba bo‘lishdi.
Do‘stlik tumani maktablarida "Ilm – eng buyuk sharaf" shiori ostida o‘tgan bu yilgi so‘nggi qo‘ng‘iroq tadbirlari har bir bitiruvchiga Vatan va ota-ona ishonchini oqlash, kelajakda yurtimiz ravnaqi uchun munosib fuqaro bo‘lish ruhida katta ilhom va mas’uliyat baxsh etdi.