Jizzax viloyati Do‘stlik tumani hokimligi

Do‘stlik tumanida maktabgacha ta’lim tizimidagi yangicha yondashuvlar, ilg‘or pedagogik tajribalar amalda o‘z ifodasini topmoqda. Ana shunday ezgu tashabbuslardan biri Do‘stlik tumani maktabgacha va maktab ta’limi bo‘limiga qarashli 5-sonli davlat maktabgacha ta’lim tashkilotida o‘tkazildi.

Ushbu ta’lim muassasasida pedagoglar tomonidan tayyorlangan bolalarning mantiqiy fikrlash qobiliyatini rivojlantirish, atrof-olam haqidagi tasavvurlarini boyitishga qaratilgan didaktik o‘yin turlari ko‘rgazmasi tashkil etildi. Ko‘rgazmada taqdim etilgan har bir o‘yin bolalarning yosh xususiyatlari, qiziqishlari va bilish ehtiyojlarini inobatga olgan holda ishlab chiqilgani bilan ahamiyatli bo‘ldi.

Didaktik o‘yinlar orqali bolalarda tahlil qilish, qiyoslash, xulosa chiqarish, mustaqil fikrlash ko‘nikmalarini shakllantirish, shuningdek, tabiat, jamiyat va kundalik hayotga oid tushunchalarni sodda va qiziqarli usulda o‘zlashtirish imkoniyati yaratildi. Ayniqsa, o‘yin elementlariga boy, qo‘l mehnati asosida tayyorlangan vositalar bolajonlarning diqqatini tortib, ularning ta’lim jarayonida faol ishtirok etishini ta’minladi.

Tadbir davomida pedagoglar o‘zaro tajriba almashib, didaktik o‘yinlardan samarali foydalanish bo‘yicha fikr va takliflarini bildirdilar. Bu esa ta’lim sifatini yanada oshirish, zamonaviy pedagogik texnologiyalarni amaliyotga keng joriy etishga xizmat qilishi shubhasiz.

Mazkur ko‘rgazma maktabgacha ta’lim tizimida bolalarning intellektual va ma’naviy kamolotiga qaratilgan ishlar izchil davom ettirilayotganining yaqqol dalili bo‘lib, kelajak avlodni har tomonlama barkamol etib tarbiyalash yo‘lidagi muhim qadam sifatida e’tirof etildi