“Kvarts” AJdagi 89,7 foiz aksiyalar paketini Davaktiv agentligiga qaytarilishi yuzasidan rasmiy munosabat
2025-04-01 19:00:00 / Yangiliklar
Avval xabar berilganidek, tegishli xususiylashtirish dasturlari doirasida oʻtkazilgan ochiq tanlov natijalariga koʻra, “Kvarts” AJ (keyingi oʻrinlarda – Jamiyat) ustav kapitalidagi 89,78 foiz aksiyalar paketi 2023-yil fevralda tuzilgan oldi-sotdi shartnomasiga (keyingi oʻrinlarda – oldi-sotdi shartnomasi) asosan 265 mlrd soʻm sotib olish toʻlovlarini uch yilda boʻlib-boʻlib toʻlash sharti bilan “Quvasoysement” AJga sotilgan.
Shu munosabat bilan, “Kvarts” AJning faoliyati monitoring qilib borilgan va toʻlov grafiklardagi uzilishlarni oldini olish maqsadida xaridor - “Quvasoysement” AJ ogohlantirib kelingan.
Oʻz navbatida, “Quvasoysement” AJning Jamiyat ustav kapitalidagi 89,78 foiz aksiyalar paketini sotib olish boʻyicha shartnomaviy majburiyatlarini bajarishdagi qiyinchiliklari tufayli, “Quvasoysement” AJni boshqaruv organlarining qaroriga asosan oldi-sotdi shartnomani taraflarning oʻzaro kelishuviga koʻra bekor qilish boʻyicha Davaktiv agentligiga murojaati kelib tushgan.
Shunga koʻra, “Quvasoysement” AJning tashabbusini inobatga olib, oldi-sotdi shartnomasi tomonlarning 2025-yil 14-fevraldagi oʻzaro kelishuviga asosan bekor qilingan va shu munosabat bilan Jamiyatning kuzatuv kengashi tarkibi qayta koʻrib chiqilib, unga Davaktiv agentligi vakillari kiritilgan.
Taʼkidlash joizki, Jamiyatning 89,78 foiz aksiyalar paketini davlat ixtiyoriga qaytarilishi oldi-sotdi shartnomasi shartlari toʻliq bajarilmaganligi natijasida yuz bergan va shartnomaviy-huquqiy munosabatlar doirasida amalga oshirilgan boʻlib, ushbu holat xususiylashtirish natijalarini qayta koʻrib chiqish yoxud milliylashtirish hisoblanmaydi.
Shu bilan birga, bugungi kunda, “Kvarts” AJni moliyaviy sogʻlomlashtirish boʻyicha “yoʻl xaritasi” tasdiqlanib, tegishli chora-tadbirlar amalga oshirilmoqda.