Davlat aktivlarini boshqarish agentligida ijro intizomi masalalariga bagʻishlangan seminar oʻtkazildi
2026-11-02 17:05:00 / Yangiliklar
2026-yil 2-noyabr kuni Davlat aktivlarini boshqarish agentligida “Ijro intizomini samarali tashkil etish, “Ijro.gov.uz” elektron tizimini yanada takomillashtirish borasida amalga oshirilayotgan ishlar” mavzusida oʻquv-amaliy seminar tashkil etildi.
Seminarni Agentlik direktorining oʻrinbosari A. Miraliyev ochib berib, oʻz soʻzida ijro intizomini mustahkamlash, topshiriqlarni oʻz vaqtida va sifatli bajarish, shuningdek, masʼul xodimlarning shaxsiy javobgarligini oshirish muhimligini taʼkidladi.
Tadbirda Agentlikning tarkibiy boʻlinmalari va hududiy boshqarmalari masʼul xodimlari, Oʻzbekiston Respublikasi Adliya vazirligi hamda “UNICON-SOFT” MChJ mutaxassislari ishtirok etdi.
Seminar davomida Agentlikda ijro intizomining joriy holati tahlil qilinib, joriy yilning oʻtgan davrida 680 ta topshiriq nazoratdan yechilgani, yil yakuniga qadar esa yana 463 ta topshiriq ijrosini taʼminlash zarurligi qayd etildi.
Shuningdek, “Ijro.gov.uz” elektron tizimida maʼlumotlarni oʻz vaqtida va toʻgʻri kiritish, ijroni tasdiqlovchi hujjatlarni ilova qilish, topshiriqlar ijrosini nazorat qilish hamda tizim imkoniyatlaridan samarali foydalanish masalalari muhokama qilindi.
Seminarning amaliy qismida Adliya vazirligi va “UNICON-SOFT” MChJ mutaxassislari tomonidan elektron tizim bilan ishlash tartibi, uning imkoniyatlari va mavjud funksiyalardan foydalanish boʻyicha batafsil tushuntirishlar va amaliy koʻrsatmalar berildi. Ishtirokchilarning savollariga mutaxassislar tomonidan javoblar qaytarildi.
Mazkur seminar Agentlik tizimida ijro intizomini yanada mustahkamlash, elektron tizim bilan ishlash sifatini oshirish hamda topshiriqlar ijrosida natijadorlikni taʼminlashga xizmat qiladi.
