Termiz shahrida Davlat aktivlari agentligining Roadshow taqdimoti bo‘lib o‘tdi. Unda tadbirkorlar va investorlarga xususiylashtirish uchun taklif etilayotgan davlat aktivlari, yer uchastkalari hamda davlat mulkini xarid qilishning yangi mexanizmlari haqida ma’lumot berildi.

 

Surxondaryo viloyatida Davlat aktivlari agentligi tomonidan an’anaviy tarzda ketma-ket oltinchi yil o‘tkazilayotgan Roadshow tadbiri bo‘lib o‘tdi. Tadbir tadbirkorlar va investorlarning davlat aktivlarini xarid qilish, foydalanilmayotgan obyektlarni iqtisodiy aylanmaga jalb etish hamda yangi investitsiya loyihalarini amalga oshirish imkoniyatlari to‘g‘risidagi xabardorligini oshirishga qaratilgan.

 

Tadbirda hududdagi tegishli tashkilotlar rahbarlari, davlat hokimiyati organlari vakillari, tadbirkorlar, investorlar va fuqarolik jamiyati institutlari vakillari ishtirok etdi. Ishtirokchilar soni 200 nafardan oshdi.

 

Roadshow davomida davlat aktivlari va yer uchastkalarini xususiylashtirish, bo‘sh turgan obyektlardan samarali foydalanish, investitsiyalarni jalb qilish hamda davlat budjetiga tushumlarni oshirish bo‘yicha amalga oshirilayotgan ishlar taqdim etildi.

Yer uchastkalari va davlat aktivlari: natijalar va istiqbollar

Davlat aktivlarini boshqarish agentligi Surxondaryo viloyati hududiy boshqarmasi boshlig‘i Samandar Xudoyberdiyev ta’kidlaganidek, 2026-yilda elektron onlayn-auksion platformasi orqali umumiy maydoni 153 gektar bo‘lgan 897 ta yer uchastkasi 132,8 mlrd so‘mga sotildi.

 

Ayni paytda umumiy maydoni 526,5 gektar bo‘lgan yer uchastkalari bo‘yicha auksion savdolari davom etmoqda.

 

Bundan tashqari, 2026-yil davomida umumiy qiymati 281,1 mlrd so‘mlik 87 ta davlat aktivi savdoga chiqarildi. Shundan 41 ta aktiv 92,5 mlrd so‘mga sotildi. Hozirgi vaqtda auksion savdolarida umumiy qiymati 333,8 mlrd so‘mlik 90 ta davlat aktivi mavjud.

 

Shuningdek, viloyatda faoliyat yuritayotgan tijorat banklariga tegishli 231 ta likvidli mulk ham auksion savdolariga chiqarilgan.

Ushbu ko‘rsatkichlar biznesni rivojlantirish va yangi loyihalarni amalga oshirish maqsadida mol-mulk hamda yer uchastkalarini xarid qilishdan manfaatdor tadbirkorlar va investorlar uchun keng imkoniyatlar mavjudligini ko‘rsatadi.

 

Xususiylashtirishning yangi mexanizmlari — biznes uchun qo‘shimcha imkoniyatlar

Tadbirda 2026-yilga mo‘ljallangan dastur doirasida nazarda tutilgan xususiylashtirishning yangi shartlariga alohida e’tibor qaratildi.

 

Xususan, davlat aktivlari va qishloq xo‘jaligiga mo‘ljallanmagan yer uchastkalarini xarid qilishda obyekt qiymatining 15 foizi miqdorida boshlang‘ich to‘lovni amalga oshirish mumkin. Qolgan summa esa qonunchilikda belgilangan muddatlarda foizsiz bo‘lib-bo‘lib to‘lanishi mumkin.

 

Bunday shartlar tadbirkorlar va investorlarning mol-mulk xarid qilish imkoniyatlarini kengaytirib, biznesni yanada rivojlantirish uchun moliyaviy resurslarni samarali rejalashtirishga yordam beradi.

 

Shuningdek, ishtirokchilarga Qoraqalpog‘iston Respublikasidagi davlat ko‘chmas mulk obyektlarini xarid qilish uchun qo‘shimcha shartlar haqida ma’lumot berildi. Jumladan, 2027-yil 1-yanvarga qadar olti oy davomida shartnoma qiymati to‘liq to‘langan taqdirda, uning qiymatidan 25 foiz miqdorida chegirma taqdim etilishi belgilangan.

 

Roadshow tadbirkorlik hamjamiyatini savdoga chiqarilgan obyektlar, amaldagi xususiylashtirish mexanizmlari va davlat mulkini xarid qilish imkoniyatlari bilan tanishtirish uchun muhim maydon bo‘ldi.

 

Bunday tadbirlarni o‘tkazish xususiylashtirish jarayonlarining ochiqligini ta’minlash, potensial investorlar doirasini kengaytirish hamda davlat aktivlaridan samarali foydalanish uchun sharoit yaratishga xizmat qiladi.

 

Davlat aktivlarini boshqarish agentligi mamlakat hududlarida xususiylashtirish jarayonlarida ishtirok etish va istiqbolli loyihalarni amalga oshirish imkoniyatlari haqida tadbirkorlar hamda investorlarni xabardor qilish ishlarini davom ettiradi.

 

Davlat aktivlari

agentligi matbuot xizmati