Davlat aktivlari agentligi, Artan Holding va Qatar City University O‘zbekistonga investitsiya kiritish imkoniyatlarini muhokama qildi
2026-10-22 18:45:00 / Yangiliklar
Tomonlar kompaniyaning davlat aktivlari, jumladan, Toshkent shahridagi ko‘chmas mulk obyektlarini va "Yangi Toshkent" hududidagi yer uchastkalarini xususiylashtirishda ishtirok etish imkoniyatlarini muhokama qildilar.
O‘zbekistonda ta’lim infratuzilmasini rivojlantirish istiqbollariga alohida e’tibor qaratildi. Artan Holding va City University Qatar vakillari mamlakatda jahon darajasidagi universitet ochish imkoniyatlarini o‘rganishga qiziqish bildirdi. Shu munosabat bilan, Qatar tomoni ushbu loyihani amalga oshirish uchun ishlatilishi mumkin bo‘lgan mavjud maydonlar va ko‘chmas mulk obyektlarini ko‘rib chiqdi. Tomonlar ta’lim sohasiga xorijiy investitsiyalarni jalb qilish uchun qulay sharoitlar yaratish, shuningdek, yuqori malakali mutaxassislar tayyorlash sohasida xalqaro hamkorlikni kengaytirish muhimligini ta’kidladilar.
Kompaniya vakillariga, shuningdek, O‘zbekiston Respublikasi Prezidentining Farmonida nazarda tutilgan davlat aktivlarini xususiylashtirishning yangi mexanizmlari taqdim etildi, bu esa obyektlarning investitsiyaviy jozibadorligini oshirish va investorlar uchun qo‘shimcha imkoniyatlar yaratishga qaratilgan.
Xususan, uch oy davomida obyekt qiymatining 35 foizi miqdorida dastlabki to‘lov amalga oshirilganda, qolgan mablag‘ besh yilgacha muddatda foizsiz bo‘lib to‘lanishi mumkin. Obyekt qiymatining 50 foizi olti oy ichida dastlabki to‘lov sifatida to‘langanda esa, qolgan miqdor yetti yilgacha bo‘lgan muddatda foizsiz bo‘lib to‘lashga ruxsat beriladi. Bundan tashqari, obyekt qiymati olti oy ichida to‘liq to‘langanda, xaridorga umumiy qiymatning 25 foizi miqdorida chegirma taqdim etiladi.
Uchrashuv yakunida Artan Holding va Qatar City University vakillarini elektron onlayn-auksionlarga qo‘yilgan obyektlar bilan amaliy tanishtirishni tashkil etish, shuningdek, Qatar tomonining ta’lim loyihasi rejasini hisobga olgan holda "Yangi Toshkent"dagi yer uchastkalari bo‘yicha mavjud takliflarni ko‘rib chiqish bo‘yicha kelishuvga erishildi.
Ma’lumot uchun: Artan Holding - 1997-yilda tashkil etilgan Qatar kompaniyasi. Asosiy faoliyat yo‘nalishlari sifatida ta’lim, ko‘chmas mulk, muhandislik, energetika va infratuzilmani rivojlantirishni o‘z ichiga oladi.
Davlat aktivlarini boshqarish
Agentligi Matbuot xizmati