Ijtimoiy tarmoqlarda “O‘zbekiston pochtasi” AJni xususiylashtirish, jamiyat kuzatuv kengashi tarkibida WB INT EXPORT vakillarining ishtirok etishi hamda moliyalashtirishni jalb qilish rejalashtirilayotgani haqida tarqalgan xabarlar munosabati bilan bir qator masalalarga qo‘shimcha tushuntirish berilmoqda.

Davlat ulushini xususiylashtirish to‘g‘risida

“O‘zbekiston pochtasi” AJ ustav kapitalidagi 92,9 foiz davlat ulushi Davlat aktivlarini boshqarish agentligiga berilgan.

Avvalroq Wildberries va Uzum Market kompaniyalari davlat ulushini sotib olishga qiziqish bildirgan edi. Shunga qaramay, mavjud investorlar tomonidan qiziqish bildirilishining o‘zi bitim amalga oshganini anglatmaydi. Rasmiy tushuntirish e’lon qilingan vaqtda davlat ulushini xususiylashtirish bo‘yicha hujjatlar rasmiylashtirilmagan.

Wildberries vakillarining kuzatuv kengashidagi ishtiroki xususida

WB INT EXPORT vakillarining kuzatuv kengashi tarkibiga kiritilishi korporativ boshqaruvni takomillashtirish, pochta operatorini rivojlantirish strategiyasini ishlab chiqish va uning faoliyati samaradorligini oshirish vazifalari bilan bog‘liq.

Shu bilan birga, kompaniya vakillarining kuzatuv kengashidagi ishtirokini ular tomonidan jamiyat aksiyalari sotib olingani bilan tenglashtirmaslik kerak. Davlat aksiyadorlik maqomini saqlab qolmoqda, jamiyatning ijro etuvchi organi esa o‘zgarmagan.

Moliyaviy mablag‘larni jalb qilish borasida

Ilgari Markaziy bankning qayta moliyalashtirish stavkasi bo‘yicha 100 mlrd so‘m miqdorida qarz mablag‘ini jalb qilish taklifi ko‘rib chiqilgan edi. Moliyalashtirishning yakuniy shartlari kelishib olinmagani sababli, ushbu qarzni jalb qilish bo‘yicha qaror qabul qilinmadi.

8-oktabr kuni o‘tkazilgan matbuot anjumanida moliyalashtirishning boshqa yo‘li — foizlar hisoblanmagan holda 360 mlrd so‘mgacha kredit liniyasini ochish bo‘yicha dastlabki kelishuvlarga erishilgani haqida xabar berilgan edi.

Mablag‘lar jamiyat ehtiyojlarini moliyalashtirish uchun zaruratga qarab ishlatilishi nazarda tutilmoqda. Shu bilan birga, kredit liniyasining ochilishi belgilangan barcha summaning avtomatik ravishda olinishini anglatmaydi. Yakuniy shartlar va kelishuvlarni keyinchalik amalga oshirish masalalari belgilangan korporativ tartib-taomillarga rioya qilingan holda ko‘rib chiqilishi kerak.

Qabul qilinayotgan qarorlarning shaffofligi haqida

Davlat ulushi, qarz mablag‘larini jalb qilish masalasining ko‘rib chiqilishi va jamiyat boshqaruv organlarining qarorlari haqidagi ma’lumotlar rasmiy xabarlarda hamda matbuot anjumani materiallarida yoritib borildi.

Amalga oshirilayotgan ishlardan maqsad — “O‘zbekiston pochtasi” AJning moliyaviy barqarorligini ta’minlash, pochta infratuzilmasini modernizatsiya qilish hamda aholi va biznes uchun ko‘rsatilayotgan xizmatlar sifatini oshirishdan iborat.

Davlat aktivlarini boshqarish agentligi jamiyat faoliyati bilan bog‘liq masalalarni atroflicha muhokama qilish uchun ochiq va qabul qilinayotgan qarorlar haqida jamoatchilikni xabardor qilishda davom etadi.