Toshkent shahri, Sirg‘ali tumanida joylashgan havo kemalariga xizmat ko‘rsatish uchun zamonaviy yonilg‘i qo‘yish majmuasi savdoga chiqarildi
2026-09-22 12:00:00 / Yangiliklar
Tegishli xususiylashtirish dasturlariga muvofiq, Davlat aktivlari agentligi Toshkent shahri, Sirg‘ali tumani, Qum-ariq koʻchasi, 33a-uy manzilida joylashgan havo kemalariga yonilg‘i qo‘yish majmuasi (keyingi oʻrinlarda – Obyekt) boʻyicha ommaviy savdo jarayonlari boshlanganligini eʼlon qiladi.
Xususiylashtirish jarayonini samarali tashkil etish maqsadida, “Ernst and Young” xalqaro kompaniyasi (keyingi oʻrinlarda – Konsultant) xususiylashtirish boʻyicha konsultant sifatida jalb etilgan.
Obyekt toʻgʻrisida maʼlumot:
Obyekt Toshkent shahri, Sirg‘ali tumani, Qum-ariq koʻchasi, 33a-uy manzilida joylashgan boʻlib, umumiy yer maydoni 11,00 gektar, bino-inshoot maydoni 6 076,0 kv.m., kommunikatsiya tarmoqlari (gaz, suv va elektr tarmogʻi) mavjud.
Savdo jarayoni haqida:
Xususiylashtirish jarayoni mahalliy va xalqaro ishtirokchilar uchun ochiq boʻlib, ikki bosqichda amalga oshiriladi:
1. Sotib olish boʻyicha qiziqish bildirish (EoI);
2. Majburiyatga ega boʻlgan takliflar taqdim etish (BO).
EoI bosqichi talablari:
Talabgorlar quyidagi maʼlumotlar bilan EoI arizalarini taqdim etishlari kerak:
- Talabgor haqida qisqacha maʼlumot (roʻyxatdan oʻtganligi toʻgʻrisida maʼlumot, faoliyat turi).
- Ustav kapitalida 5% va undan ortiq ulushga ega aksiyadorlar/ishtirokchilar va yakuniy benefitsiarlar toʻgʻrisida maʼlumot.
- Oxirgi 3 yil uchun moliyaviy hisobotlari.
EoI arizalari talabgor xohishiga koʻra oʻzbek, rus yoki ingliz tillarida tayyorlanib, 2026-yil 23-oktabr soat 23:59 (Toshkent vaqti)ga qadar elektron manziliga yuborilishi kerak.
Saralash mezonlari:
- Obyektni sotib olish uchun moliyaviy resurslarining yetarliligi;
- xususiylashtirish jarayonida ishtirok etilishini taqiqlashi mumkin boʻlgan maʼmuriy, hakamlik yoki boshqa sud jarayonlarining yoʻqligi;
- Oʻzbekiston Respublikasining 660-II-sonli “Jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurolini tarqatishni moliyalashtirishga qarshi kurashish toʻgʻrisida”gi Qonuniga rioya etilishi;
- Talabgor (konsorsium holatida, konsorsium aʼzolaridan hech biri) hech biri davlat kompaniyasi emasligi;
- Talabgor (konsorsium holatida, konsorsium aʼzolaridan hech biri) va uning tegishli shaxslaridan hech biri Yevropa Ittifoqi va AQSHning, shuningdek yirik xalqaro moliya institutlarining (Jahon banki, Yevropa tiklanish va taraqqiyot banki, Osiyo taraqqiyot banki) sanksiyalari roʻyxatiga kiritilmagan boʻlishi. Shu bilan birga, ariza topshirilgan sanada talabgorlar sanksiyalangan shaxs(lar) yoki yuqorida aytib oʻtilgan sanksiya organlari tomonidan har qanday ish yoki tergov obyekti(lari) boʻlmasligi, talabgorlar (konsorsium holatida, konsorsium aʼzolaridan hech biri) va uning tegishli shaxslaridan hech biri yuqorida aytib oʻtilgan muassasalar va davlatlarning sanksiyalar rejimiga zid boʻlgan har qanday faoliyatga (toʻgʻridan-toʻgʻri yoki biron bir shoʻba korxonasi orqali) jalb etilmagan boʻlishlari va Talabgor (konsorsium holatida, konsorsium aʼzolaridan hech biri), shuningdek uning tegishli shaxslaridan birortasining asosiy moliyalashtiruvchi tomonlari yoki kreditorlari sanksiyadagi shaxslar yoki sanksiyadagi shaxslarga tegishli boʻlgan yoki ular tomonidan egalik va nazorat qilinadigan banklar yoki moliya institutlari boʻlmasligi.
Sotib olish boʻyicha qiziqish bildirish bosqichi yakunlangach, navbatdagi bosqichga oʻtganlar roʻyxati shakllantiriladi va Davlat aktivlari agentligi tomonidan mazkur bosqich natijasi boʻyicha tegishli eʼlon beriladi.
Konsultant tomonidan qiziqish bildirgan barcha talabgorlarga Jarayon xati (Process Letter)orqali jarayon natijalari va keyingi bosqich toʻgʻrisida individual ravishda xabardor qilinadi.
Majburiyatga ega boʻlgan takliflar taqdim etish bosqichi bo‘yicha maʼlumot:
Majburiyatga ega boʻlgan takliflar taqdim etish (BO) bosqichiga oʻtgan ishtirokchilar bilan Axborotni oshkor etmaslik toʻgʻrisidagi bitim (NDA) imzolanadi hamda virtual maʼlumotlar xonasiga (VDR) kirish, shuningdek, Konsultant tomonidan tayyorlangan moliyaviy, soliq va yuridik tahliliy hisobotlarni oʻrganish, Obyektga tashrif buyurish imkoniyati yaratiladi.
Majburiyatga ega boʻlgan takliflar (BO)ni taqdim etishdan avval jamiyatning faoliyat sohasini inobatga olgan holda xususiylashtirilish va kelgusi faoliyatiga qoʻyiladigan talablarga oid Savdoning asosiy shartlari boʻyicha Bitim (Term Sheet) imzolanishi talab etiladi hamda ishtirokchilar tomonidan “E-auksion” elektron savdo platformasida ochiladigan shaxsiy kabinetlari orqali Majburiyatga ega boʻlgan takliflarining kamida 1 foizini kafolatli toʻlov (zakalat) sifatida oʻtkazish talab etiladi.
Ushbu eʼlon chop etilgandan soʻng Konsultant Obyektni targʻib qilish, investitsiya tizerlarini tarqatish va investorlar bilan faol muloqotga kirishish boʻyicha kompleks chora-tadbirlarni amalga oshiradi.
Davlat aktivlari agentligi Konsultant bilan hamkorlikda savdoning har bir bosqichi toʻgʻrisida jamoatchilikka axborot berib, ishtirokchilarni xabardor qilib borilishini taʼminlaydi.
Aloqa uchun:
- Daniyar Adigamov, “Ernst and Young” – daniyar.adigamov@parthenon.ey.com, tel.: +998 50 990-00-98
- Mullajonov Abror, Davlat aktivlari agentligi – a.mullajonov@davaktiv.uz, tel.: +998(71) 259-22-16
Diskleymer:
Davlat aktivlari agentligi sotish jarayonining ketma-ketligini oʻzgartirish yoki potensial xaridorga (xaridorlarga) sotishni yoki sabablarini tushuntirmasdan istalgan vaqtda ular bilan muzokara olib borishni rad etish huquqini oʻzida saqlab qoladi.
Ushbu eʼlon yoki uning mazmunining biron-bir qismi mazkur eʼlon chop etilishidan kelib chiqib taxmin qilinishi mumkin boʻlgan Davlat aktivlari agentligining Obyektni sotish bilan bogʻliq biror-bir shakldagi majburiyati sifatida talqin qilinmasligi kerak. Davlat aktivlari agentligi oʻz xohishiga koʻra har qanday vaqtda va har qanday munosabatda, birgalikdagi yoki shaxsiy javobgarlikni oʻz zimmalariga olmasdan:
(i) savdo jarayonining bosqichlari muddati va tartibini oʻzgartirish;
(ii) turli xil manfaatdor tomonlar uchun turli xil tartib-qoidalar boʻyicha ish tutish va/yoki Davlat aktivlari agentligi tomonidan koʻzda tutilgan reja-jadval va tartib doirasida istalgan boshqa potensial xaridorni (xaridorlarni) oldindan ogohlantirmasdan chiqarib tashlagan holda bir yoki bir nechta potensial xaridorlar bilan muzokaralar olib borish;
(iii) aniq sababga koʻra sotish jarayonini toʻxtatish;
(iv) va/yoki istalgan vaqtda va sabablarni tushuntirmasdan Savdoga taalluqli boʻlgan har qanday potensial xaridor (xaridorlar) bilan har qanday muhokama va muzokaralarni olib borish/tugatish huquqlarini oʻzida saqlab qoladi.