Hududlarda aholi bandligi va daromadlarini oshirishga qaratilgan manzilli ishlar davom etmoqda
2026-09-14 14:15:00 / Yangiliklar
Qoraqalpog‘iston Respublikasining Chimboy, Taxiatosh, Xo‘jayli va Sho‘manay tumanlarida Davlat aktivlari agentligi rahbariyati boshchiligida aholi bandligini ta’minlash, daromadlarini oshirish hamda kambag‘allikni qisqartirishga qaratilgan manzilli ishlar izchil amalga oshirilmoqda.
Hududlarda ehtiyojmand oilalar va ishsiz fuqarolar xatlovdan o‘tkazilib, ularning muammolari, qiziqishlari va imkoniyatlari o‘rganilmoqda. Shu asosda individual rivojlanish rejalari ishlab chiqilib, fuqarolarni kasb-hunarga o‘qitish, tadbirkorlikka jalb etish, imtiyozli moliyaviy ko‘maklar ajratish hamda doimiy ish o‘rinlari yaratish bo‘yicha amaliy choralar ko‘rilmoqda.
Shuningdek, aholining qo‘shimcha daromad manbalarini kengaytirishga alohida e’tibor qaratilib, tomorqa va ijara yerlaridan samarali foydalanish, mahallalarda daromadli loyihalarni yo‘lga qo‘yish hamda oilaviy tadbirkorlikni rivojlantirish bo‘yicha ishlar olib borilmoqda. Bunda har bir oilaning imkoniyatidan kelib chiqib, aniq va amaliy yechimlarni hayotga tatbiq etishga ustuvor ahamiyat berilmoqda.
Mazkur ishlarning asosiy maqsadi — hududlarda yangi ish o‘rinlari yaratish, aholi uchun barqaror daromad manbalarini kengaytirish va oilalarning iqtisodiy faolligini oshirish orqali kambag‘allikni qisqartirishdir. Bu boradagi manzilli ishlar davlat aktivlari agentligi tomonidan tizimli davom ettirilishi reja qilingan.