“Dolzarb 40 kun” dasturi doirasida Amudaryo, Keygeli, Bo'zatov tumanlarida manzilli o‘rganishlar olib borildi
2026-07-31 17:50:00 / Yangiliklar
Vazirlar Mahkamasi tomonidan belgilangan “Dolzarb 40 kun” dasturi doirasida 29-30-iyul kunlari Davlat aktivlari agentligi mas’ullari ishtirokida tumanning og‘ir toifadagi “Jumirtov” ShFY va “Jumirovul” MFYda amalga oshirilayotgan ishlar o‘rganildi. Tashrif davomida ijtimoiy himoyaga muhtoj oilalar holati, “Og‘ir mahalla” dasturi doirasida ajratilgan 3 mlrd so‘m mablag‘larning maqsadli sarflanishi hamda ichimlik suvi va sug‘orish tarmoqlarini barpo etish ishlari ko‘zdan kechirildi.
Shuningdek, "Jiluanjap" mahallasida reyestrga kiritilgan fuqaro Esmurzayev Adilbekning ijtimoiy-iqtisodiy ahvoli o‘rganilib, xonadon tom qismini ta’mirlash zarurligi aniqlandi. Homiylik mablag‘lari hisobidan uy tomi shifer bilan qoplanib, oilaning yashash sharoitini yaxshilashga amaliy ko‘mak ko‘rsatildi. Fuqaroga tadbirkorlikni yo‘lga qo‘yish, kasb-hunar egallash hamda imtiyozli kredit va subsidiyalardan foydalanish bo‘yicha tushuntirishlar berildi.
"Bo‘zatov" MFYda esa reyestrga kiritilgan fuqaro Jeyienbayev Elburusga ajratilgan 23 mln so‘mlik ssuda hisobidan 1 bosh sog‘in sigir, sutni qayta ishlash uchun zarur vositalar xarid qilingani o‘rganildi. Ushbu qo‘llab-quvvatlash natijasida fuqaroning o‘zini o‘zi band qilishi hamda oilasining doimiy daromad manbaini shakllantirish uchun sharoit yaratildi.
“Dolzarb 40 kun” dasturi doirasida amalga oshirilayotgan manzilli o‘rganishlar aholi muammolarini joyida hal etish, bandlikni ta’minlash, tadbirkorlikni qo‘llab-quvvatlash hamda hududlarning ijtimoiy-iqtisodiy rivojlanishini jadallashtirishga xizmat qilmoqda.