Oʻzbekiston Respublikasi Davlat aktivlarini boshqarish agentligi

V Toshkent xalqaro investitsiya forumi doirasida Oʻzbekiston Respublikasi Davlat aktivlarini boshqarish agentligi tomonidan davlat aktivlarini xususiylashtirish jarayonlarini jadallashtirish, xalqaro strategik investorlarni jalb qilish hamda xususiy sektor ishtirokini kengaytirishga qaratilgan muhim kelishuvlarga erishildi.

Forum yakunlari boʻyicha davlat aktivlarini xususiylashtirish sohasida investitsiyaviy va amaliy ahamiyatga ega boʻlgan ikkita hamkorlik hujjati imzolandi.

MobiUz boʻyicha AQShning “McKim and Company” kompaniyasi boshchiligidagi moliyaviy investorlar va sohaviy texnologik hamkor “JVR Enterprises LLC” (DBA – “JVR Capital Group”) ishtirokidagi konsorsium bilan hamkorlik memorandumi imzolandi

Xususan, Davlat aktivlarini boshqarish agentligi hamda AQSHning AQShning “McKim and Company” kompaniyasi boshchiligidagi moliyaviy investorlar va sohaviy texnologik hamkor “JVR Enterprises LLC” (DBA – “JVR Capital Group”) ishtirokidagi konsorsiumi oʻrtasida “Universal Mobile Systems” MCHJ (MobiUz) ustav kapitalidagi davlat ulushini xususiylashtirish jarayonini muvaffaqiyatli amalga oshirish boʻyicha hamkorlik memorandumi imzolandi.

Mazkur hamkorlik doirasida MobiUz kompaniyasini xorijiy investorga 351 mln AQSH dollari miqdorida sotish, shuningdek, telekommunikatsiya infratuzilmasini modernizatsiya qilish va tarmoqni yanada rivojlantirish maqsadida qoʻshimcha 500 mln AQSH dollari investitsiyalarni jalb etish boʻyicha hamkorlik qilish nazarda tutilgan. Loyihaning umumiy qiymati 851 mln AQSH dollarini tashkil etadi.

Ushbu kelishuv raqamli infratuzilmani modernizatsiya qilish, sohada raqobat muhitini kuchaytirish va mamlakat telekommunikatsiya tarmogʻini yanada rivojlantirishga xizmat qiladi.

“UzXCMG” qoʻshma korxonasidagi davlat ulushini xususiylashtirish boʻyicha XCMG bilan hamkorlik yoʻlga qoʻyilmoqda

Shuningdek, V Toshkent xalqaro investitsiya forumi doirasida Davlat aktivlarini boshqarish agentligi hamda Xitoyning “XCMG Construction Machinery Co., Ltd” kompaniyasi oʻrtasida “UzXCMG” MCHJ qoʻshma korxonasi ustav kapitalidagi davlat ulushini xususiylashtirish jarayonini samarali amalga oshirish boʻyicha hamkorlik memorandumi imzolandi.

Memorandum doirasida davlat ulushini xususiylashtirish boʻyicha jarayonda tomonlar oʻrtasida oʻzaro hamkorlikni yoʻlga qoʻyish, tajriba almashish hamda saʼy-harakatlarni muvofiqlashtirish orqali jarayonning samaradorligi va shaffofligini taʼminlash nazarda tutilgan.

Mazkur kelishuv “UzXCMG” qoʻshma korxonasini xususiylashtirish jarayonini xalqaro standartlar asosida tashkil etish, strategik investorlar bilan hamkorlikni mustahkamlash hamda mamlakatda mashinasozlik va sanoat kooperatsiyasini yanada rivojlantirishga xizmat qiladi.

Imzolangan hujjatlar Oʻzbekistonda davlat ishtirokini iqtisodiyotda qisqartirish, xususiy sektor rolini oshirish va davlat aktivlarini bozor tamoyillari asosida transformatsiya qilishga qaratilgan islohotlarning izchil davom etayotganini namoyon etmoqda.

Shuningdek, mazkur kelishuvlar xalqaro strategik investorlarning Oʻzbekistonda amalga oshirilayotgan keng koʻlamli iqtisodiy islohotlarga boʻlgan yuqori ishonchi va qiziqishi tobora ortib borayotganining yana bir yaqqol tasdigʻi hisoblanadi.