Davlat aktivlarini boshqarish agentligida favqulodda vaziyatlar va yong‘in xavfsizligi bo‘yicha nazariy hamda amaliy mashg‘ulotlar o‘tkazildi
2026-06-03 18:35:00 / Yangiliklar
O‘zbekiston Respublikasi Fuqaro muhofazasi boshlig‘ining 2026-yil 27-yanvardagi 1-son buyrug‘i ijrosini ta’minlash maqsadida Davlat aktivlarini boshqarish agentligida favqulodda vaziyatlarning oldini olish, ular sodir bo‘lganda to‘g‘ri harakat qilish, oqibatlarini bartaraf etish hamda tabiiy va texnogen xususiyatli favqulodda vaziyatlardan muhofaza qilish, shuningdek yong‘in xavfsizligini ta’minlash masalalariga bag‘ishlangan nazariy va amaliy mashg‘ulotlar tashkil etildi.
Tadbir Mirobod tumani Favqulodda vaziyatlar bo‘limi profilaktika katta inspektori, mayor Abidov Aziz Sobirovich boshchiligida o‘tkazildi.
Mashg‘ulotlar davomida xodimlarga favqulodda vaziyatlarning turlari, ularning kelib chiqish sabablari va oqibatlari, yong‘in sodir bo‘lganda harakatlanish tartibi, evakuatsiya qoidalari, birlamchi yong‘in o‘chirish vositalaridan foydalanish hamda jabrlanganlarga birinchi yordam ko‘rsatish bo‘yicha tushuntirishlar berildi.
Amaliy qismda xodimlar favqulodda vaziyat yuzaga kelganda tezkor va to‘g‘ri harakat qilish, binodan xavfsiz evakuatsiya qilish hamda yong‘in o‘chirish moslamalaridan foydalanish ko‘nikmalarini mustahkamladilar.
Mazkur tadbirning asosiy maqsadi xodimlarning favqulodda vaziyatlarga tayyorgarlik darajasini oshirish, yong‘in va boshqa xavf-xatarlarning oldini olish bo‘yicha bilim hamda amaliy ko‘nikmalarini mustahkamlashdan iborat bo‘ldi.
Tadbir yakunida ishtirokchilar tomonidan berilgan savollarga mutaxassislar tomonidan batafsil javoblar berildi hamda favqulodda vaziyatlarda harakat qilish bo‘yicha tavsiyalar taqdim etildi.
