Davlat aktivlari agentligida Xalqaro valyuta jamg‘armasi vakillari bilan uchrashuv bo‘lib o‘tdi
2026-04-02 10:00:00 / Yangiliklar
Joriy yilning 1-aprel kuni Davlat aktivlarini boshqarish agentligida Xalqaro valyuta jamg‘armasining O‘zbekistondagi missiyasi rahbari Yasser Abdih boshchiligidagi delegatsiya bilan uchrashuv bo‘lib o‘tdi.
Uchrashuv davomida so‘nggi yillarda O‘zbekistonda xususiylashtirish jarayonlarini jadallashtirish, shuningdek, davlat ishtirokidagi korxonalarni samarali boshqarish borasida amalga oshirilgan islohotlar hamda istiqboldagi ustuvor yo‘nalishlar muhokama qilindi.
Tomonlar ushbu yo‘nalishda qabul qilingan normativ-huquqiy hujjatlar, erishilgan amaliy natijalar hamda davlat ishtirokidagi korxonalarini xalqaro moliyaviy hisobot standartlariga (IFRS) bosqichma-bosqich o‘tkazish jarayonlariga alohida to‘xtalib o‘tdi.
Shuningdek, 2030-yilga qadar davlat ishtirokidagi korxonalarni bosqichma-bosqich xususiylashtirish orqali iqtisodiyotda davlat ulushini sezilarli darajada qisqartirish, xususan, uni 85 foizgacha kamaytirish bo‘yicha belgilangan maqsadlar yuzasidan fikr almashildi.
Uchrashuv yakunida Davlat aktivlari agentligi tomonidan ishlab chiqilgan “2026–2030-yillarda davlat ishtirokidagi korxonalarni isloh qilish va xususiylashtirish” strategiyasi loyihasi ishlab chiqilgani hamda strategiyani yanada takomillashtirish va uni kelgusida amliyotga tadbiq qilish bo‘yicha hamkorlik qilishga kelishib olindi.