Qo‘mita tizimida tarixiy meros, milliy o‘zlik va inson qadri masalalariga bag‘ishlangan seminar o‘tkazildi
2026-09-30 12:00:00 / Yangiliklar
O‘zbekiston Respublikasi Sanoat, radiatsiya va yadro xavfsizligi qo‘mitasida “Uch ming yillik ildiz va Uchinchi Renessans: tarixiy vorislik, milliy o‘zlik va ma’naviy meros — inson qadri, ma’rifat va milliy yuksalish” mavzusida ma’naviy-ma’rifiy o‘quv-seminar o‘tkazildi.
Tadbirda Qo‘mitaning markaziy apparati tarkibiy tuzilmalari, tizimdagi davlat muassasalari hamda hududiy boshqarmalarining rahbar va xodimlari ishtirok etdilar.
O‘quv-seminarda Respublika Ma’naviyat va ma’rifat markazi tomonidan tavsiya etilgan malakali ma’ruzachilar — Yusubov Jaloliddin Kadamovich, falsafa fanlari doktori (DSc), “Ma’rifat” targ‘ibotchilar jamiyati a’zosi hamda Ernazarov Fayzullo Narzullayevich, tarix fanlari doktori (DSc), “Ma’rifat” targ‘ibotchilar jamiyati a’zosi ishtirok etib, mavzu yuzasidan ma’ruzalar qildilar.
Seminar davomida O‘zbekistonning ko‘p ming yillik tarixi, tarixiy vorislik va milliy o‘zlik, ajdodlardan qolgan boy ma’naviy meros, shuningdek, jamiyat taraqqiyotida ma’rifat va inson qadri masalalariga alohida e’tibor qaratildi.
Shuningdek, inson qadrini yuksaltirish, ta’lim va bilimning jamiyat taraqqiyotidagi o‘rni, yoshlar bilan bog‘liq masalalar hamda mamlakatimizda amalga oshirilayotgan islohotlarning mazmun-mohiyati yuzasidan fikr-mulohazalar bildirildi.
Tadbir dasturi doirasida O‘zbekiston Respublikasi Prezidenti Shavkat Mirziyoyevning O‘zbekiston Respublikasi davlat mustaqilligining 35 yilligiga bag‘ishlangan tantanali marosimdagi nutqida ilgari surilgan g‘oya va tashabbuslarning mazmun-mohiyatiga bag‘ishlangan ma’ruzalar hamda videolavhalar namoyish etildi.
O‘quv-seminar yakunida Qo‘mita tizimida ma’naviy-ma’rifiy ishlarni izchil tashkil etish, xodimlarning ma’naviy va intellektual salohiyatini oshirish, jamoalarda sog‘lom ma’naviy muhitni mustahkamlash hamda ijtimoiy faollikni qo‘llab-quvvatlash masalalariga e’tibor qaratildi.