“Quvurlarni ichki diagnostika qilish asoslari” bo‘yicha xalqaro o‘quv kursi muvaffaqiyatli yakunlandi
2026-08-14 16:30:00 / Yangiliklar
Mazkur o‘quv dasturining asosiy maqsadi quvurlarni ichki diagnostika qilish yo‘nalishida faoliyat yurituvchi mutaxassislarning nazariy bilimlari va amaliy ko‘nikmalarini mustahkamlash, shuningdek, zamonaviy diagnostika texnologiyalari va ilg‘or uskunalardan samarali foydalanish bo‘yicha kasbiy kompetensiyalarini yanada rivojlantirishdan iborat bo‘ldi.
Mashg‘ulotlar davomida ishtirokchilarga quvurlarni ichki diagnostika qilishning asosiy tamoyillari va zamonaviy texnologiyalari, ilg‘or inspeksiya vositalari, diagnostika uskunalarining imkoniyatlari, magistral quvurlarda uchraydigan keng tarqalgan nuqsonlar hamda olingan diagnostika ma’lumotlarini tahlil qilish usullari bo‘yicha batafsil ma’lumotlar berildi.
Shuningdek, quvur tizimlarining sanoat xavfsizligi nuqtayi nazaridan ishonchliligini ta’minlash, aniqlangan nuqsonlarni to‘g‘ri baholash hamda diagnostika natijalaridan amaliyotda samarali foydalanish masalalariga alohida e’tibor qaratildi.
Uch kunlik o‘quv jarayoni nazariy va amaliy mashg‘ulotlar uyg‘unligida tashkil etildi. Birinchi kuni asosiy nazariy mavzular yoritilib, savol-javob sessiyalari o‘tkazildi. Ikkinchi kuni ishtirokchilar o‘z bilimlarini amaliy keyslar orqali mustahkamlab, o‘rganganlarini real vaziyatlarga tatbiq etish bo‘yicha ko‘nikmalarini rivojlantirdilar. Yakuniy kunda esa mavzular umumlashtirilib, ochiq muhokamalar hamda yakuniy savol-javoblar tashkil etildi.
Mashg‘ulotlarni ROSEN Europe B.V. kompaniyasining quvurlarni ichki diagnostika qilish yo‘nalishidagi yetakchi mutaxassislari — Evgeniy Tazov va Adilet Serik olib bordilar. Ular o‘zlarining xalqaro tajribasi va amaliy bilimlari bilan o‘rtoqlashib, ishtirokchilarning barcha savollariga batafsil javob berdilar.
Kurs yakunida erishilgan natijalar sarhisob qilinib, o‘quv dasturini muvaffaqiyatli tamomlagan ishtirokchilarga sertifikatlar tantanali ravishda topshirildi.
Mazkur xalqaro o‘quv kursi mutaxassislarning kasbiy salohiyatini oshirish, ilg‘or xorijiy tajribalarni o‘rganish hamda sanoat obyektlari va magistral quvurlarni xavfsiz va ishonchli ekspluatatsiya qilishda zamonaviy diagnostika usullarini keng joriy etishga xizmat qiladi.
Sanoat, radiatsiya va yadro xavfsizligi qo‘mitasi mutaxassislar malakasini oshirish, xalqaro hamkorlikni kengaytirish hamda sanoat xavfsizligi sohasida zamonaviy bilim va ko‘nikmalarni rivojlantirishga qaratilgan ishlarni izchil davom ettirmoqda.