O'zbekiston Respublikasi Vazirlar Mahkamasi huzuridagi Sanoat, radiatsiya va yadro xavfsizligi qo‘mitasi

🏭 Qirg‘izistonda sanoat xavfsizligi davlat nazorati Qirg‘iz Respublikasi Favqulodda vaziyatlar vazirligi tomonidan amalga oshiriladi. Nazorat xavfli ishlab chiqarish obyektlari, tog‘-kon korxonalari, portlatish ishlari, bosim ostida ishlovchi uskunalar, yuk ko‘tarish mexanizmlari, gaz ta’minoti tizimlari hamda boshqa yuqori xavfli texnik obyektlarni qamrab oladi.
Sanoat xavfsizligi sohasida korxonalarni ro‘yxatdan o‘tkazish, texnik ko‘rik va ekspertiza, avariyalarning oldini olish, ishlab chiqarish nazoratini tashkil etish, xodimlarni tayyorlash va favqulodda vaziyatlarga tayyorgarlikni ta'minlash asosiy yo‘nalishlar hisoblanadi.
☢️ Radiatsiya va yadro xavfsizligi sohasida davlat siyosatini amalga oshirish va nazoratni Qirg‘iz Respublikasi Vazirlar Mahkamasi huzuridagi Yadro va radiatsiya xavfsizligi bo‘yicha davlat agentligi olib boradi. Mamlakatda atom elektr stansiyasi mavjud emas. Biroq tibbiyot, sanoat, ilmiy tadqiqotlar va geologiya sohalarida ionlashtiruvchi nurlanish manbalaridan foydalaniladi.
Shu bois radioaktiv manbalarni litsenziyalash, hisobga olish, radiatsiyaviy monitoring, dozimetrik nazorat, radioaktiv chiqindilarni xavfsiz saqlash hamda uran qazib olishdan qolgan chiqindilar (uran tailinglari)ni boshqarish davlat nazoratining muhim yo‘nalishlaridan biridir. Qirg‘iziston ushbu sohada AEXA (IAEA) bilan yaqin hamkorlik qilib, radiatsiya va yadro xavfsizligi bo‘yicha xalqaro standartlarni joriy etib kelmoqda.
Qirg‘iziston tajribasi shuni ko‘rsatadiki, sanoat, radiatsiya va yadro xavfsizligini samarali boshqarish xavfli ishlab chiqarish obyektlarining ishonchli faoliyatini ta'minlash, atrof-muhitni muhofaza qilish hamda aholi salomatligini himoya qilishning muhim omili hisoblanadi.