O'zbekiston Respublikasi Vazirlar Mahkamasi huzuridagi Sanoat, radiatsiya va yadro xavfsizligi qo‘mitasi

Hisobot davrida qo‘mitada korrupsiyaga qarshi kurashishning huquqiy asoslari takomillashtirilib, jami 14 ta idoraviy-huquqiy hujjat qabul qilindi. Shuningdek, sohaga oid 2 ta chora-tadbirlar dasturi va 2 ta yo‘l xarita ishlab chiqilib, ularning ijrosi ta’minlanmoqda.

“Manfaatlar to‘qnashuvi to‘g‘risida”gi Qonun talablariga muvofiq, qo‘mita markaziy apparati va hududiy tuzilmalarida faoliyat yuritayotgan 149 nafar mas’ul xodim tomonidan ehtimoliy manfaatlar to‘qnashuvi to‘g‘risidagi deklaratsiyalar to‘ldirildi hamda ushbu jarayon doimiy monitoring qilib borilmoqda.

Korrupsiyaga qarshi kurashish ishlarining samaradorligini baholash maqsadida “E-anticor.uz” elektron platformasida barcha yo‘nalishlar bo‘yicha choraklik hisobotlar kiritib borilmoqda.

Qo‘mita zimmasiga yuklatilgan 64 ta funksiya bo‘yicha korrupsiyaviy xavf-xatarlar qayta baholanib, korrupsiyaviy xavf-xatarlar xaritasi tasdiqlandi. Baholash natijasida 17 ta o‘rta va 13 ta past darajadagi xavf-xatarlar aniqlanib, ularni kamaytirish yuzasidan 30 banddan iborat korrupsiyaga qarshi kurashish dasturi tasdiqlandi.

2026-yilning o‘tgan davrida rasmiylashtirilgan 25 ta davlat xaridlari bo‘yicha xo‘jalik shartnomalari kontragent tartibida tekshirildi. Tekshiruvlar natijasida salbiy holatlar va manfaatlar to‘qnashuvi aniqlanmadi. Tuzilgan shartnomalarga korrupsiyaga qarshi shartlar kiritilishi ta’minlandi.

Shuningdek, qo‘mita markaziy apparati va hududiy tuzilmalarida ishga qabul qilinayotgan, rotatsiya qilinayotgan hamda lavozimi ko‘tarilayotgan xodimlar bo‘yicha kompleks tekshiruv amaliyoti joriy etilgan.

Qo‘mita tizimi xodimlari va aholini korrupsiyaga qarshi kurashish sohasidagi islohotlar haqida xabardor qilish maqsadida 7 ta seminar-trening va 1 ta matbuot anjumani tashkil etildi. Ijtimoiy tarmoqlarda 11 dan ortiq material e’lon qilindi hamda 180 ga yaqin targ‘ibot vositalari chop etilib, joylarga o‘rnatildi.

Bundan tashqari, qo‘mitaning 102 nafar mas’ul xodimi “Korrupsiyaga qarshi kurashish virtual akademiyasi”da korrupsiyaga qarshi kurashish va uning oldini olishga qaratilgan maxsus o‘quv kurslarida malaka oshirdi.

Qo‘mitaning rasmiy veb-saytida “Korrupsiyaga qarshi kurashish” bo‘limi tashkil etilgan bo‘lib, unda targ‘ibot materiallari, idoraviy hujjatlar va qayta aloqa kanallari joylashtirilgan. Mazkur ma’lumotlar muntazam yangilanib borilmoqda.

Hisobot davrida qo‘mita tuzilmalarida 7 marotaba komplaens-nazorat tekshiruvlari o‘tkazildi. Qonunbuzilish holatlariga yo‘l qo‘ygan 1 nafar xodim bilan mehnat shartnomasi bekor qilindi, 4 nafar xodimga nisbatan intizomiy jazo chorasi qo‘llanildi, 130 nafar xodim bilan profilaktik suhbat o‘tkazildi.

Qo‘mita korrupsiyaga nisbatan murosasiz munosabatni shakllantirish, ochiqlik, halollik, shaffoflik va qonuniylik tamoyillarini mustahkamlash bo‘yicha ishlarni izchil davom ettiradi.