O'zbekiston Respublikasi Vazirlar Mahkamasi huzuridagi Sanoat, radiatsiya va yadro xavfsizligi qo‘mitasi

Sohadagi xalqaro muzokaralar o'zining muhim amaliy natijasini berdi. 14-may kuni Oʻzbekiston Respublikasi Vazirlar Mahkamasi huzuridagi Sanoat, radiatsiya va yadro xavfsizligi qoʻmitasi hamda ishlab chiqarish aktivlari yaxlitligini taʼminlash sohasida jahon yetakchisi boʻlgan "ROSEN Group" (Shveysariya/Germaniya) xalqaro kompaniyasi oʻrtasida neft-gaz va kimyo sektorida texnik hamkorlik qilish toʻgʻrisidagi Oʻzaro anglashuv memorandumi imzolandi.

Ushbu kelishuv mamlakatimiz sanoat xavfsizligida yangi sahifani ochib beradi. Memorandum texnik muloqot, doimiy bilim almashish, xavflarni boshqarish amaliyotlarini takomillashtirish hamda ekspert-tahliliy qoʻllab-quvvatlash uchun tizimli asos yaratadi.
🌐 Nima uchun aynan "ROSEN Group"? "ROSEN Group" – sanoat obyektlarini diagnostika va monitoring qilish bo'yicha 40 yildan ortiq tajribaga ega xalqaro texnologik guruhdir. Bugungi kunda kompaniya dunyoning 110 dan ortiq mamlakatida faoliyat yuritib, 4 000 dan ziyod mutaxassislarni birlashtirgan hamda shu kungacha 2 million kilometrga yaqin quvurlar inspektsiyasini muvaffaqiyatli amalga oshirgan.

📊 Kelishuv doirasidagi ilk amaliy qadamlar – 2026-yil rejalari: Hamkorlik shunchaki qog'ozda qolmaydi. Joriy yilning o'zidayoq Risk-Based Inspection (RBI), ya'ni xavfga asoslangan inspektsiya loyihasini amaliyotga tatbiq etish boshlanadi.
Loyihaning 1-bosqichi doirasida "Uz-Kor Gas Chemical" MCHJ QK ishlab chiqarish obyektlarida foydalanilayotgan 30 ta uskunada (ortiqcha bosim ostida ishlovchi idishlar) korrozion konturlar va shikastlanish mexanizmlarini aniqlash ishlari olib boriladi. Ushbu jarayonlar to'liq xalqaro API 580 ва API 581 standartlari asosida amalga oshiriladi.

💡 Bu mamlakatimiz iqtisodiyoti va xavfsizligiga nima beradi?
Xavfsizlikning oshishi: Faqatgina joriy holatni baholash bilan cheklanmay, korroziya va shikastlanishlarni oldindan kelgusida yuz berishi mumkin bo'lgan ehtimolini aniq prognoz qilish;
Uzluksizlik: Ko'pchilik tekshiruvlar uchun uskunalar va ishlab chiqarish jarayonini to'liq to'xtatish (zavodni yopish) talab qilinmaydi;
Resurslarni tejash: Gidro va pnevmosinovlar uchun sarflanadigan katta miqdordagi suv, bug', azot kabi resurslar va texnik xarajatlarni minimal darajaga tushirish.

Bir so'z bilan aytganda, Sanoat, radiatsiya va yadro xavfsizligi qo'mitasi hamda "ROSEN Group" o'rtasidagi ushbu strategik hamkorlik Oʻzbekistonning sanoat infratuzilmasini xavfsiz, ishonchli va uzoq muddatli barqaror ishlashini ta'minlashda muhim huquqiy va texnologik poydevor bo'lib xizmat qiladi.

🌐 Sanoat, radiatsiya va yadro xavfsizligi qo‘mitasi Axborot xizmati