O'zbekiston Respublikasi Vazirlar Mahkamasi huzuridagi Sanoat, radiatsiya va yadro xavfsizligi qo‘mitasi

Mazkur memorandum ikki davlatning vakolatli organlari o‘rtasida atom energetikasi sohasida tartibga solish infratuzilmasini rivojlantirish, milliy atom energetikasi dasturlarini samarali tashkil etish, normativ-huquqiy hujjatlarni ishlab chiqish, kadrlar salohiyatini oshirish hamda radiatsiya va yadro xavfsizligini ta’minlashga qaratilgan boshqa ustuvor yo‘nalishlarda hamkorlikni kengaytirishga xizmat qiladi.

Ma’lumot uchun: hozirgi kunda Xitoy Xalq Respublikasida umumiy quvvati 62,2 GVt bo‘lgan 59 ta atom elektr stansiyasi energobloklari ekspluatatsiya qilinmoqda. Shuningdek, 28 ta yangi energoblok qurilishi amalga oshirilmoqda. Atom elektr stansiyalarida yillik 451 ming GVt/soat elektr energiyasi ishlab chiqariladi.

Xitoy Xalq Respublikasi ekspluatatsiya qilinayotgan atom energobloklari soni bo‘yicha dunyoda ikkinchi o‘rinni (AQShdan keyin), atom elektr stansiyalarining umumiy quvvati bo‘yicha esa uchinchi o‘rinni (AQSh va Fransiyadan keyin) egallab kelmoqda. Qurilayotgan yangi atom energobloklari soni bo‘yicha esa Xitoy dunyoda birinchi o‘rinni egallaydi.

Imzolangan memorandum atom elektr stansiyalarini qurish va ekspluatatsiya qilishda radiatsiya va yadro xavfsizligini ta’minlash bo‘yicha nazorat amaliyotini o‘rganish, mutaxassislar malakasini oshirish hamda atom energiyasidan foydalanish sohasida ilg‘or xalqaro tajribani O‘zbekistonda joriy etishda muhim ahamiyat kasb etadi.