O‘zbekiston Respublikasi Madaniyat vazirligi

Qozog‘istonning Aqtau shahrida “Aqtau – 2025 Turk dunyosi madaniyat poytaxti” tadbirlari doirasida “Qrimning qirq qahramoni” dostoni izidan “Vatanparvarlik va qahramonlik qo‘shig‘i” nomli xalqaro Turkiy xalqlari epik festivali tashkil etildi.

Mazkur festival – bu faqatgina adabiy-badiiy tadbir emas, balki turkiy xalqlarning umumiy tarixiy xotirasi, mushtarak qadriyatlari, epik san’at va dostonchilik an’analarini sharaflash, milliy qahramonlik timsollarini madh etish, yosh avlodga ma’naviy merosni yetkazish maqsadida tashkil etilgan muhim madaniy hodisa hisoblanadi.

Festivalning ochilish marosimi o‘ziga xos tarixiy va ramziy ma’no kasb etdi. O‘zbekiston Respublikasi delegatsiyasi vakillari taniqli ijodkorlardan Gulnara Allambergenova – Qoraqalpog‘iston Respublikasining xalq baxshisi, Sirimbetov Bakbergen – qoraqalpoq xalq jirovi, Eshboyev Muhammad – “Shuhrat” medali sohibi, ijodkor; Zafariddin Temirov – Respublika Baxshichilik san’ati markazi direktorining ijodiy masalalar bo‘yicha o‘rinbosari ishtirok etishdi.

O‘zbekiston vakillari festival dasturiga o‘zlarining boy epik ijodi, milliy kuy-ohanglar, dostonlardan parchalar va baxshichilik namunalari bilan hissa qo‘shishdi. Ular ijro etgan sahna chiqishlari turkiy xalqlarning birligi, Vatanga sadoqat, xalq qahramonlarini ulug‘lash kabi g‘oyalarga boy bo‘lib, mehmonlar va tomoshabinlar qalbida chuqur taassurot qoldirdi.

Festivalda O‘zbekistondan tashqari Turkiya, Qozog‘iston, Qirg‘iziston, Ozarbayjon, Tojikiston, Tatariston va boshqa turkiy tilli davlatlarning mashhur baxshi va jorulari ham ishtirok etdi. Har bir delegatsiya o‘z milliy liboslari, dostonchilik madaniyati, musiqiy asboblari va ijodiy chiqishlari bilan sahnaga ko‘tarildi. Bu esa festivalga chinakam xalqaro ko‘lam va ko‘p ovozli madaniy uyg‘unlik baxsh etdi.

Tomoshabinlar har bir ijodkorning chiqishini hayrat va ilhom bilan kuzatib, turkiy dunyo xalqlari o‘rtasidagi madaniy mushtaraklik, dostonchilik san’atining unutilmas an’analariga guvoh bo‘ldilar. Ayniqsa, “Qrimning qirq qahramoni” dostoni asosida tayyorlangan kompozitsiyalar orqali tarixiy qahramonlar obrazi, xalq jasorati va Vatanga sadoqat mavzusi keng yoritildi.

Festivalning birinchi kunida katta ochilish marosimi bo‘lib o‘tdi. Unda turkiy davlatlarning rasmiy vakillari, madaniyat arboblari, ijodkorlar, baxshi va jorular ishtirok etdilar. Ochilishda xalqaro darajadagi tantanali konsert dasturi namoyish etildi, unda har bir xalqning epik janrdagi ijodi jonli ijroda sahnalashtirildi.

Shuningdek, ochilish kunida sahnada O‘zbekiston, Qozog‘iston, Qirg‘iziston, Turkiya va boshqa davlatlar vakillarining umumiy ishtirokidagi do‘stlik kompozitsiyasi namoyish etildi. Bu esa madaniy aloqalarning bardavomligidan dalolat berdi.

Aqtau shahrida boshlangan “Vatanparvarlik va Qahramonlik Qo‘shig‘i” xalqaro epik festivalining birinchi kuni – bu turkiy xalqlar o‘rtasidagi do‘stlik, ma’naviy yaqinlik va umumiy tarixga hurmat ramzi bo‘ldi. Bu kun, ayni damda, yosh avlod uchun epik san’atga qiziqish uyg‘otgan, dostonchilik maktabining o‘ziga xos saboqlarini ko‘rsatgan muhim madaniy voqea sifatida tarixda qoladi.

Festival yakunida ishtirokchilarga TÜRKSOY tashkiloti va Mang‘istov viloyati hokimligi nomidan minnatdorchilik yorliqlari va sertifikatlar topshirildi.