Hurmatli Turk dunyosi madaniyatlari II forumi tashkilotchilari va ishtirokchilari!

Hurmatli “Baxshi san’ati” IV xalqaro festivali tashkilotchilari va mehmonlari!**

Avvalo, barchangizni Turk Akademiyasi nomidan va shaxsan o‘zim nomimdan samimiy qutlashga ijozat bergaysiz!

Bugungi kunda qadimiy Xorazm zaminida o‘tayotgan turkiy dunyoni birlashtiruvchi tadbirlarning chuqur ramziy ma’noga ega ekanini alohida ta’kidlashni istardim.
Bu serhosil zamin o‘tmishda qudratli davlatlar — Qoraxoniylar imperiyasi, Xorazmshohlar davlati va Oltin O‘rda tarixida ko‘p bora muhim o‘rin tutgan.

Bu hududning barcha tarixiy davrlari uning boy madaniy kodida o‘z izini qoldirganiga shubha yo‘q. Arxeologik yodgorliklardan tortib xalq og‘zaki ijodigacha — bularning barchasi O‘zbekiston va butun turkiy dunyoning umumiy xazinasi hisoblanadi.

Turk dunyosi madaniyatlari II forumining muvaffaqiyatli o‘tishiga va qardosh mamlakatlarimiz o‘rtasidagi madaniy hamkorlikni mustahkamlashga munosib hissa qo‘shishiga ishonaman!

Bugungi kunda turkiy davlatlar o‘rtasida faol hamkorlik va integratsiya jarayoni ketmoqda. Shu munosabat bilan, turkiy davlatlar rahbarlari turli xalqaro maydonlarda o‘z siyosiy iroda va qarashlarini ochiq ifoda etdilar.
Bu jarayonda O‘zbekiston juda muhim va mas’uliyatli o‘rin tutayotganini alohida ta’kidlamoqchiman.

Turkiy davlatlar tashkiloti, Turkiy Parlamentlar Assambleyasi, TURKSOY, Turkiy Akademiya, Turkiy Madaniyat va Meros jamg‘armasi, Turkiy Sarmoya jamg‘armasi tashkil etildi.
Bu tashkilotlarning barchasi turkiy davlatlar o‘rtasidagi yaqinlashuv va hamkorlikka xizmat qilmoqda.

Shu bilan birga, shuni yodda tutishimiz kerakki, mamlakatlarimiz o‘rtasidagi aloqalar xalqlarimizning umumiy tarixi va madaniyatining mustahkam poydevoriga tayanadi.
Shu nuqtai nazardan, xalqlarimiz o‘rtasidagi madaniy hamkorlik alohida ahamiyat kasb etadi.

Bugungi kunda mustaqil mamlakatlarimiz madaniy hamkorlik uchun keng imkoniyatlarga ega.
Biz, eng avvalo, boy madaniy merosimizni o‘rganish va asrash yo‘lida birgalikda harakat qilishimiz kerak.

Bu borada, shubhasiz, O‘zbekiston, xususan, Xorazm tajribasi boshqa turkiy davlatlar uchun ham ibratli namuna bo‘la oladi.
Zero, bu zamin — al-Xorazmiy, al-Beruniy, Xorazmshoh Jaloliddin, Abulg‘ozi Bahodirxon kabi buyuk siymolar vatani hisoblanadi.
Bu o‘lka boy ilm-fan, qadimiy me’morchilik va ajoyib arxeologik yodgorliklarga ega.

Turkiy davlatlar birgalikda turkiy moddiy va nomoddiy madaniyatning ajoyib namunalarini YUNESKOning Jahon merosi ro‘yxatiga kiritish uchun ham hamkorlikda harakat qilishlari kerak.

Biz umumiy madaniyatimizni jahon miqyosida keng targ‘ib qilishimiz lozim.
Birgalikda madaniy marshrutlarni yaratishimiz va umumiy turistik faoliyatni rivojlantirishimiz kerak.

Qisqacha aytganda, madaniyat va turizm vazirliklari, xalqaro tashkilotlar, nodavlat notijorat tashkilotlar va mahalliy hamjamiyatlar tomonidan ko‘plab ishlarni amalga oshirish zarur.

Shu nuqtai nazardan, madaniy forum uchrashuvlari va madaniyat sohasidagi dolzarb masalalarni muhokama qilish uchun juda muhim va qulay platforma ekanligini alohida ta’kidlab o‘tishni istardim.

Birinchi madaniyat forumi o‘tgan yili Ozarbayjonda, 30 yillik bosqindan ozod etilgan tarixiy Shusha shahrida bo‘lib o‘tgan edi.
Ikkinchi forum esa, bugun tarixiy Xorazm zaminida, O‘zbekistonda o‘tayotgani biz uchun quvonarlidir.

Shunday qilib, doimiy umumiy platforma shakllanmoqda va u uzoq muddatli hamkorlik jarayonlari uchun asos bo‘lib xizmat qilishi mumkin bo‘ladi.

Turkiy Akademiya turkiy hamkorlik tashkilotlaridan biri va turkiy dunyoda ilmiy tadqiqotlarni muvofiqlashtirish markazi sifatida Shusha shahridagi birinchi madaniyat forumida faol ishtirok etdi.
Bugun esa biz tarixiy Xorazm zaminda turganimizdan benihoya mamnunmiz.

Akademiyamizning asosiy vazifasi — turkiy xalqlarning tillari, tarixi va madaniyatini o‘rganishdan iborat.
Shu bois, biz kelajakda turkiy davlatlar uchun nihoyatda muhim bo‘lgan Madaniyat forumi g‘oyasini rivojlantirishga har tomonlama hissa qo‘shishga tayyormiz.

Yana bir bor chin qalbimdan bugungi muhim tadbirlarni muvaffaqiyatli o‘tkazishingizni tilayman!

E’tiboringiz uchun rahmat!