Бухоро давлат университетида ўтказилган "Раҳбар ва ёшлар" учрашуви талабаларнинг қатор ташаббус ва таклифлари рўёбига хизмат қилди
2025-04-18 09:00:00 / Янгиликлар
Ҳар қандай давлатнинг келажаги маънан етук, жисмонан соғлом ва интеллектуал салоҳиятли ёшларга боғлиқ. Шу маънода, ёшларга бўлган эътибор – мамлакатнинг эртанги кунига бўлган эътибордир. Бухоро давлат университетида ўтказилган «Раҳбар ва ёшлар» учрашуви айнан ана шундай эзгу мақсадларга хизмат қилди.
2025 йил 8 март куни Ички ишлар ҳамда Олий таълим, фан ва инновацияларни ривожлантириш вазирликлари томонидан қабул қилинган қўшма қарорга кўра, барча олий таълим муассасаларига ҳудудий ички ишлар органлари раҳбарлари масъул этиб бириктирилди.
Шу асосда, Бухоро давлат университетида ёшларни ватанпарварлик руҳида тарбиялаш, ҳуқуқбузарликларнинг олдини олиш ва бўш вақтларини мазмунли ташкил этиш бўйича амалий ишлар олиб борилмоқда.
Университет раҳбарияти, вилоят ИИБ, бош имом ва профилактика инспекторлари иштирокида очиқ мулоқот ўтказилиб, талаба-ёшларга ҳуқуқ ва мажбуриятлар, имкониятлар ҳақида тушунтиришлар берилди.
Шунингдек, ҳуқуқбузарлик ҳолатлари таҳлил қилиниб, уларнинг олдини олиш бўйича аниқ чора-тадбирлар белгиланди. Талабалар ўз таклиф ва саволларини билдиришди, мутасаддилар томонидан батафсил жавоблар қайтарилди. Айрим масалалар юзасидан эса университет ва масъулларга топшириқлар берилди.
Учрашув ёшлар билан очиқ мулоқотни таъминлаш, уларнинг муаммоларига ечим топиш ва фаоллигини оширишга хизмат қилди.
Бухоро вилояти ИИБ Ахборот хизмати