Устоз-шогирд. Бардавом анъаналар
2024-08-20 08:10:00 / Янгиликлар
Ҳар қандай фаолият соҳасида касбий билим ва кўникмалар бир шахсдан бошқасига етказилиши орқали бойитилади. Бунда муваффақият қозониш атиги ўн фоиз шогирднинг қобилиятига, қолгани эса касб сирларини баҳам кўрган ва тажрибаси билан ўртоқлашган устознинг саъй-ҳаракатларига боғлиқ. Ички ишлар органларида ҳам «устоз-шогирд» анъанаси кенг тус олган бўлиб, янги ходимларнинг касбий-маънавий шаклланишида муҳим аҳамият касб этиб бормоқда.
Миржалол Мадаминов ИИВ Академиясини тамомлагач, Андижон шаҳар ИИОФМБ Эксперт-криминалистика бўлимида эксперт-криминалист лавозимида хизмат қила бошлади. Тажрибали устозлар — бўлим бошлиғи, подполковник Тоҳиржон Аҳмаджонов, катта эксперт-криминалист, майор Бахтиёржон Каттаев раҳбарлигида ўз ишининг устасига айланди.
Ҳозирги кунда вилоят ИИБ ЭКМ катта эксперт-криминалисти, капитан М. Мадаминов дактилоскопик, трасологик, баллистик, ҳуснихат экспертизалари ҳужжатларнинг техник экспертизаси ва совуқ қуроллар экспертизасини ўтказиш ҳуқуқига эга.
- Эксперт-криминалист фаолияти муайян хусусиятларга эга бўлишни талаб қилади, — дейди капитан М.Мадаминов. — Криминалист, албатта, қизиқувчан, изланувчан, юксак интеллектли, билимли ва шу билан бирга, ўзига ишонган бўлиши керак. У яхши хотирага эга бўлиши, таҳлил қилишни билиши ва текширилаётган объектга узоқ вақт диққатини жамлай олиши лозим.
Бироқ аксарият ҳолларда, фақат дастлабки таҳлиллар ҳодиса жойида амалга оширилади, далилларни тўлиқ ва синчиклаб текшириш ишлари эса лабораторияда олиб борилади.
Криминалистика фани доимий равишда ривожланиб, тергов олиб боришга ёрдам берадиган энг янги усуллар ва технологиялар билан бойитилмоқда. Ушбу усуллардан бири ДНК текшируви бўлиб, у қолдирилган органик излар, масалан, соч, тер ёки сўлак ёрдамида инсоннинг шахсини аниқлаш имконини беради.
Бугунги кунда капитан Миржалол Мадаминов ўз тажрибаси ва билимларини ёш ходимлар билан ўртоқлашишда давом этмоқда.
Борис КЛEЙМАН, ўз мухбиримиз.
Андижон вилояти.