Oliy taʼlim tizimida kiberxavfsizlikni kuchaytirish boʻyicha Kiberxavfsizlik markazi bilan memorandum imzolandi
2026-05-08 11:00:00 / Vazirlik yangiliklari

Muloqot davomida tomonlar soʻnggi yillarda taʼlim tizimida raqamlashtirish jarayonlari jadallashishi bilan birga, axborot tizimlari va mazmunan muhim maʼlumotlar bazalariga boʻlayotgan kiberhujumlar xavfi ham ortayotganini qayd etdilar. Shu munosabat bilan, sohada axborot infratuzilmasini himoya qilishning eng zamonaviy va samarali mexanizmlarini joriy etish masalalari koʻrib chiqildi.
Shundan soʻng, tomonlar Oliy taʼlim, fan va innovatsiyalar vazirligi hamda “Kiberxavfsizlik markazi” DM oʻrtasida taʼlim sohasida axborot xavfsizligini yaxshilashga qaratilgan hamkorlik memorandumini imzoladilar. Hozir taʼlim muhitining raqamli xavfsizligini taʼminlash – davr talabi ekanligi alohida taʼkidlandi.
Memorandumda oliy taʼlim sohasi uchun ixtisoslashtirilgan “CERT-EDU” kiberxavfsizlik boʻlinmasini tashkil etish, axborot almashinuvini kuchaytirish, talabalar amaliyoti va bandligini taʼminlash, mutaxassislar malakasini oshirish, oʻquv dasturlarini takomillashtirish hamda ilmiy tadqiqot ishlarini birgalikda rivojlantirish nazarda tutilgan.
Vazir Qoʻngʻirotboy Sharipov mazkur hamkorlik nafaqat tizimni texnik jihatdan himoya qiladi, balki mehnat bozori uchun yuqori malakali, “raqamli gigiyena” va kiberhimoya koʻnikmalariga ega boʻlgan kadrlar zaxirasini shakllantirishga xizmat qilishini taʼkidladi.






