Qoraqalpog‘istonda fermerlar va agrotadbirkorlar agroakseleratsiya dasturida ishtirok etyapti
2026-08-25 19:00:00 / Vazirlik yangiliklari

Mazkur dastur Innovatsion rivojlanish agentligi hamda International Center for Biosaline Agriculture (ICBA) hamkorligida, Abu Dhabi Fund for Development (ADFD) moliyaviy ko‘magida tashkil etilgan. Dasturning asosiy tadbirlari Nukus yoshlar texnoparkida o‘tkazilmoqda.
Agroakselerator dasturida jami 207 nafar ishtirokchi ro‘yxatdan o‘tgan bo‘lib, ularning 122 nafari, ya’ni 59 foizini xotin-qizlar tashkil etadi.
Dastur doirasida ishtirokchilarga qishloq xo‘jaligi xomashyosini qayta ishlash, qo‘shimcha qiymatga ega mahsulot yaratish, qiymat zanjirini shakllantirish, mahsulotni qadoqlash va brendlash, tannarx va narxni hisoblash, bozorga chiqish hamda biznes-reja ishlab chiqish bo‘yicha nazariy va amaliy bilimlar berilmoqda.
Shuningdek, ishtirokchilar Nukus tumanidagi “Biogumus” fermer xo‘jaligi hamda Orolbo‘yi xalqaro innovatsiya markaziga amaliy tashrif buyurdilar. Tashrif davomida quritilgan pomidor mahsulotlarini yetishtirish, qayta ishlash va eksportga tayyorlash jarayonlari, shuningdek, akvaponika, aqlli sug‘orish tizimlari va zamonaviy qishloq xo‘jaligi texnologiyalari bilan yaqindan tanishdilar.
Dastur yakuniga qadar ishtirokchilar o‘z mahsulot yoki agrobiznes g‘oyalarini shakllantirib, mini biznes-reja va loyiha taqdimotlarini ishlab chiqadilar. Yakuniy Demo Day tadbirini 2026-yil 8-sentabr kuni o‘tkazish rejalashtirilgan.








