Сурхондарё вилояти ҳокими Улуғбек Қосимовнинг воҳа аҳлига Ўзбекистон Республикаси давлат мустақиллигининг ўттиз тўрт йиллиги муносабати билан байрам табриги
2025-09-01 07:50:00 / Раҳбариятнинг баёнотлари ва нутқлари
Айни кунларда, халқимиз ҳаётида тарихий бурилиш ясаб, эзгу интилишларимиз, орзу ниятларимизни рўёбга чиқарган – Мустақил-лигимизнинг 34 йиллиги байрами юртимизда катта хурсандчилик билан қарши олинмоқда.
Барчамиз учун қадрли бўлган ушбу айём билан Сиз азизларни, яратувчанлик ва бунёдкорлик иштиёқи билан яшаётган барча воҳадошларимизни ҳамда ҳурматли меҳмонларимизни чин қалбимдан муборакбод этаман!
Ҳурматли тадбир иштирокчилари,
Маълумки, халқимиз азал-азалдан яқин қўшнилар билан бир тану - бир жон бўлиб, аҳил-иноқликда яшаб келган.
Айниқса, Муҳтарам Президентимиз Шавкат Мирзиёев раҳнамолигида қўшни мамлакатлар билан ўзаро дўстона муносабатларни яхшилаш, ҳамкорлик ва ҳамжиҳатлик ишлари янги босқичга кўтарилиб, янада мустаҳкамланмоқда.
Сўзимнинг исботи сифатида бугунги шодиёнамизга ташриф буюриб, хурсандчилигимизга шерик бўлаётган азиз меҳмонларимиз Тожикистон Республикаси Хатлон вилояти раисининг ўринбосари Заробиддин Файзуллозода, Ҳисор шаҳри раиси Жаббор Носирзода, Турсунзода шаҳри раиси Парвиз Акрамзода, Бохтар шаҳри раиси Абдулмажид Мўминзод, Дўсти тумани раиси Даврон Нишонзода, Жалолиддин Балхий тумани раиси Рустам Холиқзода, Абдураҳмон Жомий тумани раиси Маҳмуд Амрзода ҳамда Шаҳринав тумани ижроия ҳокимияти раисининг биринчи ўринбосари Олимжон Анварзодаларга халқимизга, миллий байрамимизга бўлган ҳурмат ва эътиборлари учун воҳадошларимиз номидан чуқур миннатдорчилик билдираман.
Ҳурматли байрам иштирокчилари,
Мустақиллигимизнинг бу йилги шодиёна-лари муҳтарам Президентимиз ташаббуси билан “Ватан учун, миллат учун, халқ учун” шиори остида кенг нишонланаётганида ҳам чуқур маъно, ҳаётий ҳикмат мужассам.
Зеро, бугун мамлакатимиздаги барча ислоҳотлар замирида халқимиз, миллати-миз, Ватанимиз манфаати ётибди, барча давлат ташкилотлари маҳаллагача тушиб ишни ташкил этган ҳолда кўплаб муаммо ва масалаларга ечим топиш, халқимиз турмуш фаровонлигини янада яхшилашга қаратилган устувор вазифаларни амалга оширмоқда.
Шу нуқтаи назардан сўнгги йилларда мамлакатимизда ҳар бир жабҳада янгиланиш даврига қадам қўйилганлиги ва бу эса халқимизнинг ҳаётида ўз аксини топаётган-лигини бугун яна бир бор мамнуният билан таъкидламоқчиман.
Куни кеча ўтказилган Республикамизнинг асосий байрам шодиёналаридаги Муҳтарам Президентимизнинг табрикларида сўнгги йилларда юртимиз ижтимоий-иқтисодий ҳаётида ҳамда ташқи сиёсатида эришилган натижалар тўғрисида батафсил тўхталиб ўтилди.
Қувонарлиси, эътироф этилган натижалар, тарихий ўзгаришларни вилоятимиз мисолида ҳам гувоҳи бўлиб келмоқдамиз.
Бир сўз билан айтганда, ўтмишдан илму-фан, маънавият, маърифат ва маданият марказларидан бири бўлиб келган Сурхон воҳаси ҳам янада обод, гўзал ва фаровон масканга айланмоқда.
Қадрли тадбир иштирокчилари!
Шундай файзли, хурсандчилик кунида вилоятимизда эришилган ютуқларни эътироф этиш ҳамда олдимизда турган янги марраларни Сизлар билан ўртоқлашишни ўринли деб биламан.
Чунки, бу ишлар ўз-ўзидан бўлаётгани йўқ. Қўлга киритилган ютуқларимиз, фаровон ҳаётимиз замирида Муҳтарам Президенти-мизнинг узоқни кўзлаб олиб бораётган оқилона сиёсати ҳамда танти, мард, аҳил ва ҳамжиҳат воҳадошларимизнинг заҳматли меҳнати ётибди.
Ҳурматли байрам иштирокчилари,
Шу ўринда айтиш керак, мамлакатимизда амалга оширилаётган ислоҳотларда муносиб иштирок этган ҳар бир инсон, унинг меҳнати юксак даражада қадрланмоқда.
Мустақиллигимизнинг 34 йиллиги муносабати билан ҳам мамлакатимизда олиб борилаётган ислоҳотларда фаол иштирок этиб, унинг равнақига ўзининг муносиб ҳиссасини қўшиб келаётган турли соҳа вакиллари давлатимизнинг юксак мукофот-ларига сазовор бўлиб, орден ва медаллар билан тақдирланди.
Улар орасида 14 нафар воҳадошимизнинг борлиги ҳаммамизда қувонч ва юксак фахр туйғусини уйғотди.
Фурсатдан фойдаланиб, Сиз азизлар, қолаверса, воҳамиз аҳли номидан юксак мукофотларга сазовор бўлган фидойи воҳадошларимизни яна бир бор самимий муборакбод этаман.
Ҳурматли тадбир қатнашчилари!
Мустақиллигимизнинг ўтган йилларига назар ташласак, халқимиз фаровон ҳаётининг кафолати бўлган тадбиркорликни ривожлантириш, уларга қулай муҳит яратиш ва кўплаб имтиёзлар жорий этилиши ўзининг ижобий самарасини бермоқда.
Жумладан, кейинги 8 йилда тадбиркорлар сони 3,2 баробарга ошди ва бугунги кунда 36 мингтага етди.
Асосийси, энди тадбиркорларимиз орасида Президентимиз таъбири билан айтганда “чемпион тадбиркорлар” ҳамда хорижий компаниялар билан рақобат қила оладиган маҳаллий йирик компаниялар синфи шаклланиб, уларнинг сони кун сайин ортиб бормоқда.
Улар вилоятимиз иқтисодий имкониятларини яхшилаш, аҳоли бандлигини таъминлашда ўзининг муносиб ҳиссасини қўшмоқда.
Ҳурматли воҳадошлар,
Мамлакатимизда тадбиркорлик ва солиқ соҳаларидаги ислоҳотлар ва қулай инвестицион муҳитнинг яратилиши хорижий инвесторлар диққат марказида бўлганлигини хорижий давлатларга қилган сафарларимиз давомида амин бўлмоқдамиз.
Мисол учун, биргина август ойи бошида Хитойга қилган сафаримиз давомида ўтказилган 2 та йирик Бизнес форумида 100 дан ортиқ салоҳиятли компания раҳбарлари билан учрашиб, умумий қиймати 10 млрд. долларлик жами 17 та лойиҳа бўйича дастлабки келишувларга эришдик.
Жорий йилда хорижий инвестиция жалб қилиш вилоят тарихида бўлмаган 1,1 млрд. долларга етказилади.
Мисол учун, бугунги кунгача хорижий инвесторлар иштирокида Қумқўрғон туманида пахтани қайта ишловчи “Қумтекс Инвест” корхонаси, Бандихон туманида “Бандихон кластер” йирик ип йигирув фабрикаси ишга туширилди.
Термиз туманида қиймати 28 млн. доллар бўлган базальт плиталарни ишлаб чиқариш корхонаси фаолияти йўлга қўйилди.
Бундан ташқари, аҳолининг турмуш даражасини яхшилаш бўйича ҳам катта ишлар амалга оширилмоқда.
Жумладан, жорий йилда вилоятимизда барча Давлат дастурлари доирасида жами 1 037 та қурилиш объектлари учун 3,3 трлн. сўм маблағ ажратилиб, 180 дан ортиқ ижтимоий соҳа ва 200 дан ортиқ инфратузилма объектлари, 215 км. ичимлик ва оқова сув тармоқлари, 480 км автомобиль йўллари, 8 дона кўприк ва йўл ўтказгичлар қуриш ҳамда 9 200 хонадонли замонавий кўп қаватли уй-жойларни барпо этиш ишлари амалга оширилмоқда.
Бугун, байрам муносабати билан жами қиймати 460 млрд сўм бўлган 158 та қурилиш ишлари якунланган объектларни фойдаланишга топширдик.
Шунингдек, Ҳурматли Президентимизнинг ташаббуслари билан вилоятдаги 77 та оғир маҳаллалардаги томорқа суви, электр тармоқлари ва йўл инфратузилмалари яхшиланиб, жами 170 мингдан ортиқ аҳолининг яшаш шароитлари яхшиланди.
Жорий йилнинг ўтган даври мобайнида 460 км. умумий фойдаланишдаги, 300 км. ички хўжалик автомобиль йўллари ҳамда 5 та йирик кўприклар таъмирланди.
115 км. ичимлик ва 11 км. оқова сув тармоқлари ҳамда 5 та ичимлик суви иншооти қурилди.
Вилоятнинг Сариосиё, Денов, Шўрчи, Қумқўрғон, Бандихон ва Олтинсой туманларида “Тўпаланг-Термиз” лойиҳаси доирасида ичимлик суви таъминоти тубдан яхшиланди.
Натижада 540 минг аҳоли илк бор марказлашган ичимлик суви билан таъминланди, 945 минг аҳолининг ичимлик суви таъминоти яхшиланиб, вилоят аҳолисининг марказлашган ичимлик суви билан таъминланиш даражаси 47 фоиздан 66 фоизга етказилди.
Йил якунигача “Тўпаланг” сувини Термиз шаҳрига қадар етказиб бериш бўйича ишлар жадал амалга оширилмоқда.
Умуман лойиҳа якуни билан вилоятдаги 1 млн. 700 минг аҳоли истиқомат қилаётган 493 та маҳалланинг сув таъминоти тубдан яхшиланиб, аҳолининг ичимлик сув билан таъминланиш даражаси 80 фоизга етказилади.
Шунингдек, 130 та трансформатор пунктлари ва 360 км электр узатиш тармоқлари янгиланди. 440 та трансформатор пунктлари ва 1 300 км. электр узатиш тармоқлари мукаммал таъмирланди. 7 581 дона таянч устунлари ўрнатилди.
Натижада 66 минг хонадонларнинг электр энергияси таъминоти янада яхшиланди.
Олдинги йилларда қурилган 70 та кўп қаватли уйларда таъмирлаш ишлари амалга оширилиб, ушбу уйларда истиқомат қилаётган 10 мингдан ортиқ фуқароларимизнинг яшаш шароитлари яхшиланди.
Бу йил устувор вазифаларимиздан бири бўлган аҳолини уй-жой билан таъминлаш борасида вилоятимизда марра жуда катта олинган бўлиб, жорий йил якунига қадар жами 9 минг 200 хонадонли 156 та кўп қаватли уй-жойлар фойдаланишга топширилади.
Бугунги кунга қадар 2 минг 65 хонадонли 46 та уй-жойлар қурилиб, фойдаланишга топширилди.
Хусусан, Ангор, Бойсун, Жарқўрғон, Сариосиё ва Термиз туманларида фойдаланишга топширилган “Янги Ўзбекистон” массивлари ҳудудларга янгича файз бағишлади десам адашмаган бўламан.
Айни кунларда, Термиз шаҳрида, Денов ва Қумқўрғон туманларида янги замонавий турар-жой массивлари барпо этилмоқда.
Жумладан, “Термиз СИТИ”, “Денов СИТИ” лойиҳалари амалга оширилмоқда.
Сариосиёда барча қулайликларга эга бўлган, замонавий Аэропорт ишга туширилди. Натижада вилоятнинг шимолий туманлари аҳолисининг Тошкент шаҳри ва бошқа ҳудудларга бориб-келиши учун қулайлик яратилди.
Термиз шаҳрида “Тиббиёт кластери” ишга туширилиб, тиббий хизматлар кўлами оширилди ҳамда вилоятнинг ўзида мураккаб жарроҳлик операциялари йўлга қўйилди.
Хусусан, 10 дан ортиқ мураккаб жарроҳлик амалиётлари, жумладан, илк бор очиқ юрак жарроҳлиги амалиёти йўлга қўйилиб, бугунги кунга қадар 100 нафарга яқин беморларда ушбу амалиёт мувафаққиятли амалга оширилди.
Шунингдек, сифатли таълим учун замонавий шароитлар яратиш мақсадида кейинги 8 йилда 450 та мактабларда янги замонавий бинолар қурилди, 135 та мактаб мукаммал таъмирланди.
Мактаб таълимида амалга оширилган ишлар натижасида таълим сифати тубдан яхшиланди. Мисол учун, вилоятимиз мактаб ўқувчиларининг биргина фан олимпиадаларидаги кўрсаткичи Республикада сўнгги йиллардаги охирги 14-ўриндан 4-ўринга кўтарилди.
Бундан ташқари, вилоятда давлат боғчалари сони 289 тадан 487 тага етказилиши ҳамда 2 минг 767 та нодавлат боғчалари ташкил этилиши натижасида 3-7 ёшли болалар қамрови 12 фоиздан 68 фоизга ошди.
Қадрли тадбир иштирокчилари!
Мамлакатимизда сўнгги йилларда аҳолини, хусусан, ёшларни иш билан таъминлаш, кадрлар билан ишлаш масаласига алоҳида эътибор қаратилмоқда.
Вилоятимизда ҳам билимли, хорижий тилларни ўзлаштирган, ташаббускор ёшлар сони йилдан йилга ошиб бормоқда.
Жорий йилдан вилоятимизда янги тажрибани бошладик. Бу йил вилоятдаги олий таълим муассасаларини тамомлаган 11 минг нафар сурхондарёлик битирувчилар орасидан 427 нафар энг иқтидорли, энг билимлиларини танлаб олиб, барчасини иш билан таъминладик.
Бу орқали меҳнат бозорига билимли, истиқболли кадрлар кириб келиб, яқин йиллар ичида барча соҳаларда жуда катта ўзгаришлар амалга оширилади.
Қадрли воҳадошлар!
Сўнгги йилларда вилоятда қишлоқ хўжалиги соҳасида ҳам туб ўзгаришлар бўлмоқда.
Хусусан, жорий йилги мавсумда заҳматкаш фермер ва деҳқонларимиз томонидан бошоқли дон етиштиришда ўртача ҳосилдорлик 92 центнерга етказилди.
Қувонарлиси, энди деҳқонларимиз ҳам изланиб, янгилик қилишмоқда.
Мисол учун, сўнгги йилларда вилоятда Қизил ловия, Брокколи карами, Кабачки, Қизил карам, Руккола, Малина, Селдрей барги каби юқори даромадли экинлар экилмоқда.
Айни вақтда далаларда етиштирилган пахта ҳосилини йиғиб териб олишда ҳам ишлар уюшқоқлик билан олиб борилмоқда.
Қадрли воҳадошлар!
Шу ўринда айтиш керак, вилоятнинг бетакрор табиати, бой тарихи ва маданияти кун сайин хорижий ва маҳаллий туристларни ўзига жалб этиб, уларнинг оқими кўпайишига хизмат қилмоқда.
Бир сўз билан айтганда, вилоятнинг табиий, маданий ва туристик салоҳияти ҳам йилдан-йилга намоён бўлиб бормоқда.
2018 йил давомида вилоятимизга 21 минг нафар хорижий туристлар ташриф буюрган бўлса, ҳозирги кунда бир ойда ташриф буюрганлар сони 20 мингдан ошиб кетди.
Шу нуқтаи назардан вилоятда ички туризм ва аҳолини мазмунли хордиқ чиқариши учун қулай шароит яратиш борасида ҳам қатор ишлар амалга оширилмоқда.
Хусусан, Термиз шаҳридаги истироҳат боғи ҳудудида 10 млн. доллар қийматдаги “Этно шаҳарча” лойиҳаси, Денов, Шўрчи, Қумқўрғон, Музработ ҳамда Жарқўрғон туманларида 24/7 режимдаги ёшлар ва туризм кўчалари фаолияти йўлга қўйилиб, 50 минг нафардан ошиқ аҳолининг бўш вақтини мазмунли ўтказиши учун қулай шароитлар яратилди.
Айни кунларда вилоятнинг 12 та ҳудуди - Термиз шаҳри, Ангор, Бандихон, Бойсун, Денов, Қизириқ, Музработ, Олтинсой, Сариосиё, Шўрчи ва Узун туманларида умумий қиймати 118 млрд. сўм бўлган туну-кун ишлайдиган туризм ва гастрономик кўчалар ташкил этилмоқда.
Бундан ташқари, дунёга машҳур “Омонхона” ва “Сангардак” ҳудудларида йирик туризм маркази ҳамда “Жанубий Сурхон” сув омбори ҳудудида замонавий экотуризм мажмуаси лойиҳалари амалга оширилмоқда.
Сариосиё туманида Сангардак туризм марказининг тоғли ҳудудидаги 50 гектар ер майдонида қиймати 25 млн. долларлик туризм маскани ташкил этилмоқда.
Бойсун туманида Термиз давлат университети томонидан “Дарбанд ўқув амалиёт базаси”даги 10 гектар майдонда қиймати 11 млрд. сўмлик экстремал туризм лойиҳаси амалга оширилмоқда.
Шеробод туманидаги туз конида Эроннинг “Капа Юрт Соон” компанияси томонидан қиймати 15 млн. долларлик эко ва тиббий туризм комплекси фаолияти йўлга қўйилиши режалаштирилган.
Қадрли воҳадошлар!
Бундан ташқари, айни кунларда вилоятда истиқболли бўлган 20 дан ортиқ йирик лойиҳаларни амалга ошириш режалаштирилган.
Хусусан, биргина Хитой давлатининг йирик компаниялари иштирокида умумий қиймати салкам 3 млрд. доллар бўлган лойиҳалар амалга оширилади.
Жумладан,
-Термиз туманида 1 000 гектар майдонда қиймати 1,0 млрд. долларлик 20 та 12 қаватли замонавий турар-жой мажмуаси, индустриал парк, меҳмонхона, умумий овқатланиш нуқталари, дам олиш оромгоҳлари, ижтимоий соҳа объектлари, савдо ва хизмат кўрсатиш нуқталари қурилади;
-Жарқўрғон туманида қиймати 700 млн. долларлик кўмирни қайта ишлаб газ олиш ва қўшимча нейлон олиш лойиҳаси йўлга қўйилади;
-Шеробод туманида қиймати 500 млн. доллар бўлган калий тузини қазиб олиш ва қайта ишлаш йўлга қўйилади;
-Шеробод ва Музработ туманларида қиймати 210 млн. долларлик 200 МВт қувватга эга шамол ва қуёш электр энергияси станцияси қурилади;
-вилоятдаги 545 та мактаб ва 343 та боғчаларга қиймати 150 млн. долларлик 200 МВт бўлган қуёш панеллари ўрнатилади;
-Термиз шаҳрида қиймати 100 млн. долларлик 15 та - 2 592 та хонадон ҳамда 200 та савдо ва хизмат кўрсатиш объектларини ўз ичига олган 14-25 қаватли замонавий уйлар қурилади;
-Бойсун туманида қиймати 50 млн. долларлик кўмир қазиб олишни кенгайтириш ва қайта ишлаш йўлга қўйилади;
-вилоятнинг тоғли ҳудудлардаги 20 минг гектар ер майдонида қиймати 20 млн. долларлик доривор ўсимликларни етиштириш йўлга қўйилади ҳамда Термиз шаҳрида шу йўналишдаги замонавий халқаро мактаб ва тиббиёт лабораторияси ташкил этилади;
-Музработ туманида 3 минг гектар ер майдонида қиймати 15 млн. долларлик шоличилик ва шолини қайта ишлаш, гуручдан озиқ овқат ва косметика маҳсулотларини ишлаб чиқариш йўлга қўйилади.
Бундан ташқари, вилоятда маҳаллий тадбиркорлар иштирокида ҳам йирик лойиҳалар амалга оширилмоқда.
Мисол учун, ўтган йили фаолияти йўлга қўйилган “Термиз халқаро савдо Маркази” Эркин савдо зонаси аналоги сифатида Сариосиё туманида 6 гектар ер майдонида қиймати 25 млн. долларлик Тожикистон ва Ўзбекистон чегараси ҳудудида Халқаро савдо маркази ташкил этилади.
Қадрли тадбир иштирокчилари!
Албатта, вилоятда йўлга қўйилган ва йўлга қўйилаётган бундай лойиҳаларни амалга оширишда фидойи халқимиз, тадбиркорларимиз ва турли соҳа вакилларининг катта ҳиссаси бор.
Фурсатдан фойдаланиб, уларнинг машаққатли меҳнатларини алоҳида эътироф этиб, ўз миннатдорчилигимни билдираман.
Азиз воҳадошлар ва муҳтарам меҳмонлар!
Барчангизни, Сизлар орқали воҳамиз аҳлини, яна бир бор, энг улуғ, энг азиз байрам - мустақиллик байрами билан самимий табриклаб, эл-юрт равнақи, тараққиёти йўлидаги фидокорона фаолиятингизга муваффақиятлар тилайман.
Юртимиз тинч, ҳаётимиз фаровон, мустақиллигимиз абадий бўлсин!
Эътиборларингиз учун раҳмат!