Бугун Сурхондарё вилояти ҳокими Улуғбек Қосимов "Донгфенг Лиузҳоу Мотор Cо., Лтд" компаниясининг Жилин университети Синдао автомобил тадқиқот институти вице-директори Фу Хао бошчилигидаги делегацияни қабул қилди.
2025-05-17 17:25:00 / Янгиликлар
Юртимизда инвестиция муҳитини яхшилаш, саноат лойиҳаларини амалга ошириш, янги иш ўринлари яратиш ва иқтисодиётни барқарор ривожлантиришга қаратилган ислоҳотлар доирасида хорижий компаниялар билан ҳамкорлик изчил кенгайиб бормоқда. Айниқса, Хитой компаниялари билан инвестициявий алоқалар янги босқичга кўтарилмоқда.
Бугун Сурхондарё вилояти ҳокими Улуғбек Қосимов "Донгфенг Лиузҳоу Мотор Cо., Лтд" компаниясининг Жилин университети Синдао автомобил тадқиқот институти вице-директори Фу Хао бошчилигидаги делегацияни қабул қилди.
Учрашув чоғида мамлакатимизнинг саноат, автомобилсозлик ва ишлаб чиқариш соҳаларидаги имкониятлари, шунингдек, Сурхондарё вилоятининг салоҳияти ва ҳудудий афзалликлари ҳақида батафсил маълумот берилди. Мазкур маълумотлар асосида Хитой компаниясининг вилоятда замонавий автомобил заводи ташкил этиш бўйича таклифи муҳокама қилинди.
Музокаралар давомида Хитой компанияларининг сўнгги йилларда глобал автомобилсозлик бозорида эгаллаб бораётган мавқеи ва уларнинг илғор технологиялари алоҳида қайд этилди. Лойиҳанинг техник-иқтисодий асосларини чуқур ўрганиш ва уни амалга ошириш имкониятларини муҳокама қилиш мақсадида ҳар икки томон мутахассислари иштирокида кенгайтирилган музокаралар ўтказишга келишиб олинди.