Президентимизнинг қарори билан тасдиқланган "Тараққиёт ва етакчилик маскани" дастурига мувофиқ Сурхондарё вилоятида жами 30 та, жумладан, Термиз туманидаги Қаҳрамон ва Қўнғирот маҳаллаларида инфратузилмани ривожлантириш ишлари амалга оширилмоқда.

Бугун вилоят ҳокими Улуғбек Қосимов Термиз тумани Қўнғирот маҳалласида бўлиб, дастур доирасида режалаштирилган лойиҳалар ва тадбирлар тақдимоти билан танишди.

Муҳокама жараёнида маҳалланинг мавжуд имкониятлари ва инфратузилмавий ҳолатини инобатга олган ҳолда лойиҳаларни янада такомиллаштириш зарурлиги таъкидланди. Лойиҳаларни ишлаб чиқишда ҳудуднинг реал имкониятлари ва мавжуд салоҳияти етарлича ҳисобга олинмагани танқид қилинди.

Масъулларга маҳалла ҳудудидан ўтаётган янги автомагистрал йўли атрофидаги имкониятлар ҳамда бошқа омилларни ҳисобга олган ҳолда тадбиркорлик лойиҳаларини қайта ишлаб чиқиш вазифаси юклатилди. Шунингдек, паррандачилик кооперациясини, хусусан, курка парваришлаш лойиҳасини амалга ошириш учун мақбул жой танлаш ҳамда бу орқали ёшлар бандлигини таъминлаш бўйича топшириқлар берилди.