Сурхондарё вилояти ҳокими У.Қосимовнинг қишлоқ хўжалиги соҳасида амалга оширилаётган ислоҳотлар натижалари ҳамда келгуси йилги вазифалар бўйича МУРОЖААТИ
2025-12-17 09:40:00 / Раҳбариятнинг баёнотлари ва нутқлари
Ассалому алайкум ҳурматли воҳадошлар, қадрли деҳқон ва фермерлар, сувчи ва чорвадорлар ҳамда барча қишлоқ хўжалиги ходимлари.
Авваламбор, Сизларни “Қишлоқ хўжалиги ходимлари куни” билан табриклайман.
Азиз ваҳодошлар!
Ҳурматли Президентимиз томонидан соҳага катта эътибор қаратилиб, деҳқонларнинг меҳнатини қадрлаш, оғирини енгил қилиш, даромадларини ошириш учун кўплаб имтиёзлар, субсидиялар берилмоқда, соҳага илм ва замонавий хорижий технологиялар ва техникалар олиб келинмоқда.
Хусусан, кластерлар тизими жорий этилди, давлат буюртмаси тўлиқ бекор қилиниб, маҳсулот етиштириш ва сотиш бозор принципи механизмларга ўтилди, маҳсулот етиштириш учун имтиёзли кредит ҳамда субсидиялар берилмоқда.
Натижада, вилоятимизда:
Пахтачиликда, ўртача ҳосилдорлик 2020-йилда 27 ц/га бўлган бўлса жорий йилда ўртача ҳосилдорлик 46 ц/га етказилди.
12 та фермер хўжалиги 80 центнердан, 31 таси
70-80 центнердан, 104 таси 60-70 центнердан, 408 таси 50-60 центнердан ҳосил етиштирди.
Ғаллачиликда, жорий йилда ўртача ҳосилдорлик
90 центнердан ошиб, 2020 йилга нисбатан 25 ц/га кўп ҳосил олинди.
Мева-сабзавотчиликда хам янги навлар ва экинларни экиш ҳамда йилига 2-3 марта ҳосил олиш ҳисобига
1 гектардан олинаётган ҳосил ва даромад ошмоқда.
Бунда, банан, малина, размарин, мята, дайкон ва бошқа сердаромад экинларни экиш ишлари бошланди.
Аҳолини деҳқончиликка ўргатиш учун Термиз туманида “Томорқа мактаби ташкил этилди” ва камбағал реестрига киритилган оила аъзолари ўқитилмоқда.
Техника сотиб олишда берилган имтиёзлар ҳисобига жорий йилда 675 та, шу жумладан, 62 та замонавий пахта териш машиналари сотиб олинди.
Гўшт нархини барқарорлаштириш учун жорий йилда қиймати 20 млн долларлик 45 та чорвачилик лойиҳалари амалга оширилмоқда.
Ушбу лойиҳаларда чет давлатлардан 1,5 минг бош наслли қорамоллар ҳамда Мўғулистон давлатидан 7 минг бош қўйлар олиб келинди.
Ҳурматли тадбир иштирокчилари,
Жорий йилнинг 10 декабрь куни давлатимиз раҳбари бошчилигида ўтказилган “Қишлоқ хўжалиги ходимлари” куни муносабати билан соҳа вакиллари билан учрашувда деҳқонлар учун янада кўплаб имкониятлар ва имтиёзлар берилди.
Хусусан,
-томчилаб суғориш технологиясини жорий этишга имтиёзли кредит ажратилади.
-ўз маблағидан пахта ва ғалла етиштирган фермерга ҳосилнинг 10 фоизигача қисмини субсидия берилади.
-пахта ва ғаллачилик фермерларнинг рейтинги юритилади. Бунда, рейтингда юқори поғона турган фермерларга кредит пахта учун 8 фоиз, ғалла учун 10 фоиз қилиб белгиланади.
-устоз-шогирд тизими яратилади ҳамда паст ҳосил олган фермерлар илғор фермерларга бириктирилади.
-интенсив боғ ташкил қилиш учун 7 йилга 3 йиллик имтиёзли давр билан 14 фоизли кредит берилади.
-Сертификатланган кўчат сотиб олиш харажатининг 50 фоизи бюджетдан тўланади. Мева турига қараб шпалерлар учун фермерларга 20 минг сўмдан 70 минг сўмгача субсидия ажратилади.
-пахта ва ғалла йўналишидаги фермерларга ўз ерида чорвачиликни йўлга қўйиш учун 20 сотихгача жойда енгил конструкцияли бино қуришга рухсат берилади.
-балиқчиликда четдан наслдор она балиқ олиб келиш харажатининг ярми қоплаб берилади ва бошқа кўплаб имтиёзлар берилган.
Қадрли воҳадошлар
Ҳурматли Президентимиз томонидан берилган имтиёзлар ва белгиланган топшириқлар асосида ишлаб чиқилган 2026 йил режалари тўғрисида тўхталиб ўтсам.
Қишлоқ, ўрмон ва балиқ хўжалиги маҳсулотлари ишлаб чиқариш ҳажмини 43,7 трлн сўмга (ўсиш 103,5 %) етказамиз.
Соҳада 142,1 минг нафар доимий ва мавсумий иш ўринлари яратилади.
Барча тоифада 33,5 минг гектарда август-сентябрда пиёз, саримсоқпиёз ва “тўқсонбости” усулида сабзавотлар экилиб, 711 минг тонна эртаки маҳсулотлар етиштириш кутилмоқда.
5,2 минг гектарда интенсив сабзавот етиштирилади ва бу майдонларда ҳосилдорлик 350-400 ц/га етказилади.
1,1 минг га мевали боғ, 456 минг гектар токзорлар барпо этилади.
505 гектар иссиқхоналарда 24 минг тонна маҳсулотлари етиштирилади.
Пахтачиликда илғор технологиялар кенг майдонларда жорий этилади. Жумладан, 28 минг гектар маҳаллий ҳамда 35 минг гектарга кўсак қурти ва гербицидга чидамли хорижий навлар экилади.
Интенсив агротехнология қўлланадиган майдонлар 1,2 баробарга кўпайтирилиб, умумий майдони 20,1 минг гектарга етказилади ва янгидан томчилатиб суғориш технологиялари жорий этилади.
Барча майдонларда 76х10 см қўшқатор схема жорий этилади.
Натижада, 63 минг гектар пахта майдонларидан 326 минг тонна (+34,7 минг тонна) ҳосил етиштириш имкони яратилади.
8,3 минг гектарда “устоз-шогирд” тизими асосида пахта етиштириш тажрибадан ўтказилади. Бунда 105 та тажрибали, фидоий кластер ва фермер хўжаликлари “устоз” сифатида 30 центнердан паст ҳосил олган фермер хўжаликларига бириктирилади.
Замонавий интенсив агротехнологияларни кенг жорий этиш орқали пахтачиликда ҳосилдорлик 50 центнердан оширилади, ғaллaчиликдa эса 100 центнерга етказилади.
Музработ туманида 11,6 минг гектарда шоли экилиб, 56 минг тонна шоли етиштирилади.
Қиймати 414 млрд сўмлик 961 та янги қишлоқ хўжалиги техника ва агрегатлари сотиб олинади.
Шу жумладан, 52 та пахта териш машиналари олиб келиниб, пахта йиғим теримида механизация даражаси 24 фоиздан 37 фоизга етказилади;
41,7 минг гектар майдонда сув тежовчи технологиялар жорий этилади;
1 658 км узунликдаги ички суғориш тармоқларини бетонлаштирамиз.
Мева-сабзавотни маҳсулотларини қайта ишлаш даражаси 14 фоизга, гўштни қайта ишлаш 4 фоизга ҳамда сутни қайта ишлаш 16 фоизга етказилади.
Қуввати 11,4 минг тонна бўлган 4 та агрологистика маркази фаолияти йўлга қўйилади.
Хориждан 7,5 минг бош наслли қорамол ҳамда
7,2 минг бош қўй-эчки олиб келиниб, улар ветеринария талабларига мувофиқ турли касалликларга қарши эмланади ва белгиланган меъёрлар асосида парваришлаш ишлари ташкил этилади.
Барча тоифа хўжаликларда 200 минг бош қорамоллар идентификация қилинади.
Умуман, 2026 йилда қишлоқ хўжалигининг барча соҳаларида амалга ошириладиган аниқ режаларни белгилаб олдик.
Бу ишларни тизимли олиб бориб, деҳқон ва фермерларни қўллаб-қувватланган ҳолда барча режаларни ортиғи билан бажариб, энг асосий деҳқонларнинг даромадларини оширишга қаратилган тадбирларни амалга оширамиз.
Ҳурматли деҳқон ва фермерлар!
Сизларни яна бир бор “Қишлоқ хўжалиги ходимлари куни” ва “Ҳосил байрами” билан чин қалбимдан самимий табриклайман.
Барчангизга мустаҳкам сиҳат-саломатлик, хонадонингизга тинчлик-хотиржамлик, файзу-барака, фаолиятингизда улкан муваффақиятлар тилайман. Байрамингиз муборак бўлсин!
Эътиборларингиз учун раҳмат.