Янги йил табриги
2025-01-01 09:45:00 / Раҳбариятнинг баёнотлари ва нутқлари
Ассалому алайкум, қадрли юртдошлар, азиз туманимиз аҳли!
Бетакрор диёримизга янги – 2025 йил кириб келмоқда.
Мана шундай ҳаяжонли лаҳзаларда дуогўй нуронийларимиз, меҳрибон опа-сингилларимиз, фидойи ёшларимизни тобора яқинлашиб келаётган Янги йил билан чин қалбимдан табриклаб, барчангизга сиҳат-саломатлик, тинчлик-хотиржамлик, бахту саодат ва оилавий фаровонлик тилайман.
Азиз дўстлар!
Ҳаммамизга маълум, ортда қолаётган йил мамлакатимиз тарихида ўзига хос сиёсий йил бўлди. Жумладан, Парламент ҳамда маҳаллий кенгашларга ўтган сайловларда Сиз азизлар сиёсий ҳуқуқларингиздан эмин-эркин фойдаланиб, ўз хоҳиш-иродангизни кўрсатган ҳолда муносиб номзодлар учун овоз бериш жараёнларида фаол иштирок этганингиз таҳсинга сазовор.
Қолаверса, 2024 йил бутун дунё қатори юртимиз учун ҳам синовли келди.
Шунга қарамасдан, Сиз азизларнинг матонатингиз, фидокорона меҳнатингиз биланЁшлар ва бизнесни қўллаб-қувватлаш йилида барча соҳаларда катта ўзгаришлар, ижобий натижаларни амалга оширдик.
Аҳолининг турмуш шароитини яхшилашга, иқтисодиётимизнинг етакчи тармоқларини ривожлантиришга ҳаракат қилдик. Юқори технологияларга асосланган янги корхоналар, аҳоли турар жойлари, тадбиркорлик субъектлари ишга туширилди. Йўлларимиз равон, боғча ва мактаблар, шифохоналаримиз обод бўлди.
Миришкор деҳқон ва фермерларимиз бу йилги қийинчиликларга қарамасдан, пилла, ғалла, пахтадан, қолаверса ўз томорқаларидан мўл ҳосил етиштирди.
Давлатимиз раҳбари ҳурматли Шавкат Миромонович Мирзиёев томонидан кичик бизнес ва хусусий тадбиркорлик ривожи учун янада кенг имкониятлар очилиши эса соҳа ривожига катта туртки берди.
Йил давомида аҳоли, айниқса, ёшлар ва хотин-қизлар учун кўплаб янги иш ўринлари яратилди.
Қадрли туманимиз аҳолиси!
2024 йилда амалга оширганимиз каби Янги Атроф-муҳитни асраш ва “яшил” иқтисодиёт йилида ҳам ҳурматли Президентимиз бошлаб берган иқтисодий ва ижтимоий соҳаларда кенг кўламли ислоҳотларимизни изчил амалга ошириб, Сизларнинг қалбларингиздан муносиб жой олишга ҳаракат қиламиз.
Олиб борадиган ҳар бир эзгу амалларимизда инсон, унинг қадр –қиммати доимий меҳримиз ва эътиборимиз марказида бўлади. Бунинг учун бор билим, куч ва имкониятларимизни ишга соламиз.
Азиз юртдошлар!
Қалбларимиз пок ниятларга тўлиб турган ушбу қувончли лаҳзаларда сизларни, сизлар орқали барча туманимиз аҳлини янги – 2025 йил билан яна бир бор чин дилдан муборакбод этаман.
Барчангизга сиҳат-саломатлик, хонадонларингизга файзу барака, оилавий бахту саодат тилайман. Янги йилнинг қадами қутлуғ келсин, барча эзгу ниятларимиз амалга ошсин, Ватанимиз осмони доимо мусаффо бўлсин!
Янги йил барчамизга муборак бўлсин, азизларим!
Ҳурмат билан
Шавкат Дарвишев,
Дўстлик тумани ҳокими.