Ǵárezsizlik bayramı aldınan 163 jańa obekt iske qosıldı

Ilajda mámleketimiz basshısı aymaqlardaǵı studiyalarǵa jıynalǵan keń jámiyetshilik wákillerin, olar arqalı pútkil xalqımızdı jaqınlasıp kiyatırǵan ullı bayram menen qutlıqladı.

Ótken on jılda Ózbekstanda insan qádirin ulıǵlaw hám xalıqtıń abadanlıǵın arttırıwǵa qaratılǵan keń kólemli reformalar júz berdi. Isbilermenlikke keńnen jol ashılıp, ekonomikanı diversifikaciyalaw, básekige shıdamlı sanaat tarmaqların jaratıw, shetki rayon hám awıllardıń infrastrukturasın jaqsılaw boyınsha úlken jumıslar orınlandı. Bilimlendiriw, medicina hám mádeniyat tarawlarına itibar jańa basqıshqa kóterildi.

– Sońǵı on jıl mámleketimiz tariyxında jańa Oyanıw dáwiri – Úshinshi Renessans tiykarın qurıw basqıshı sıpatında máńgi mórlendi, – dedi Prezidentimiz.

Bul dáwirde ekonomikamızdıń kólemi 2,5 eseden zıyat arttı. Ekonomika tarmaqlarına 160 milliard dollar sırt el investiciyası tartılıp, ulıwma bahası 76 milliard dollarlıq 2 mıń 163 iri sanaat joybarı iske qosıldı, derlik 6 million xalıq turaqlı jumıs ornı menen támiyinlendi.

Búgin elimizde dúnyanıń jetekshi kompaniyaları, iri investorları hám xalıqaralıq finans institutlarınıń qatnasıwında kóplegen joybarlar ámelge asırılmaqta. Investiciyalardıń kóbeyiwi menen sanaatımızdıń kórinisi de túp-tiykarınan ózgermekte.

– Biz shiyki zat eksport etken mámleketten onı tereń qayta islew shınjırı tiykarında tayar ónimdi jáhán bazarına alıp shıǵatuǵın ekonomikaǵa ótip atırmız. Eń áhmiyetlisi, jańa kárxanalar menen birge zamanagóy texnologiyalar, jańa kásipler hám joqarı mamanlıqtaǵı jumıs orınları da payda bolmaqta,-dedi mámleketimiz basshısı.

Usı jıldıń ózinde 1,7 milliard dollarlıq 56 iri zamanagóy sanaat hám servis obekti jumıs basladı, 8,8 mıń joqarı dáramatlı jumıs ornı jaratıldı.

Sonday-aq, byudjetten ajıratılǵan 46 trillion sum esabınan 385 mektep, 113 baqsha, 81 emlewxana, 7,5 mıń kilometr jol, 3,2 mıń kilometr ishimlik suwı hám kanalizaciya tarmaqları qurıldı, ońlandı hám rekonstrukciyalandı.

Búgingi máresimde elimizdiń barlıq aymaqlarında ulıwma bahası derlik 50 trillion sum bolǵan 72 iri sanaat hám servis joybarı jáne 91 sociallıq taraw obekti paydalanıwǵa tapsırıldı. Olardıń ashılıwı Ǵárezsizlik bayramına múnásip sawǵa boldı.
Jańa joybarlar esabınan 15 mıń jumıs ornı jaratıladı, byudjetke jılına qosımsha 1 trillion sum túsim túsiwi támiyinlenedi.

Investiciyalıq joybarlar energetika, awıl xojalıǵı hám azıq-awqat sanaatı, metallurgiya, avtomobil qurılısı, elektrotexnika, qurılıs materialları, taw-kán, toqımashılıq hám jeńil sanaat sıyaqlı áhmiyetli baǵdarlardı qamtıp alǵan.

Sonıń ishinde, Sırdárya wálayatında 1 mıń 573 megavattlı elektr energiyasın islep shıǵarıw quwatlılıǵı, Qaraqalpaqstan Respublikasında 200 megavattlı samal elektr stanciyası hám 100 megavattlı energiya saqlaw sisteması iske qosıldı. Nawayı wálayatındaǵı jańa energetika joybarları jılına 657 million kilovatt-saat elektr energiyasın islep shıǵaradı.

Bul joybarlar arasında mámleketimizdiń eksport potencialın sezilerli arttıratuǵın quwatlıqlar da bar. Ándijan, Namangan hám Jizzaq wálayatlarında iske qosılǵan toqımashılıq, trikotaj hám gilem ónimlerin islep shıǵarıw kárxanaları millionlaǵan dollarlıq eksporttı támiyinleydi. Samarqand hám Tashkent wálayatlarında qurılǵan jańa metallurgiya kárxanaları da sanaat kooperaciyasın keńeytiw hám importtıń ornın basıwǵa xızmet etedi.

Prezidentimiz búgingi joybarlardı tek ǵana investiciya hám eksport kórsetkishleri menen ólshew durıs bolmaytuǵının atap ótti. Jańa oqıw jılı aldınan sociallıq tarawda da kóplegen zamanagóy obektler paydalanıwǵa tapsırılmaqta. Olardıń arasında 36 baqsha, 43 mektep, 7 joqarı bilimlendiriw mákemesi hám 3 emlewxana bar.

Jańa Tashkent aymaǵında dúnya standartları tiykarında 10 gektar maydanda qurılǵan Jańa Ózbekstan universitetiniń zamanagóy kompleksi usılardıń qatarına kiredi. Bul jerde 7 mıń studenttiń bilim alıwı ushın sharayat jaratılǵan.

Joqarı bilimlendiriw mákemesinde Garvard universiteti menen birgelikte Rektorlar mektebiniń jumısı jolǵa qoyıldı. Oksford universiteti menen birgelikte mámleketlik xızmetkerlerdiń mamanlıǵın arttırıw boyınsha “Bilimlendiriw xabı” shólkemlestiriledi. 1-oktyabrden Jasalma intellekt institutı jumıs baslaydı.

Sonday-aq, 30 mıń kvadrat metr maydanǵa iye bes qabatlı jańa Milliy kitapxana eń zamanagóy texnikalar menen úskenelengen. Ol bir waqıttıń ózinde 1,5 mıń kitapqumarǵa xızmet kórsete aladı. Bul jerde 28 den aslam oqıw xanası hám zallar, hár qıylı sıyımlılıqtaǵı konferenciya zalları shólkemlestirilgen, 200 mıńnan aslam kitap jámlengen.

Qarshı qalasında 400 milliard sumlıq Ekonomika hám pedagogika universitetiniń zamanagóy imarat hám obektleri qurıldı. Bul jerde 3 mıń student bilim aladı, 700 xalıq dáramatlı jumıs penen támiyinlenedi.

Ferǵana wálayatındaǵı jańa zamanagóy medicina mákemesinde bolsa jılına 60 mıń nawqastı emlew hám 30 mıń hayaldı skriningten ótkeriw imkaniyatı jaratıldı.

Mámleketimiz basshısı jańa obektlerdi qurıwda qatnasqan investor hám isbilermenlerdiń miynetin joqarı bahaladı.

– Siz kirgizip atırǵan hár bir investiciya Ózbekstan kelesheginiń tiykarın bekkemleydi. Siz jaratıp atırǵan hár bir jumıs ornı shańaraqlardıń abadanlıǵına xızmet etedi. Siz islep shıǵarıp atırǵan hár bir ónim mámleketimizdiń ekonomikalıq potencialın jańa basqıshqa alıp shıǵadı. Siz eksport etip atırǵan hár bir tovar Ózbekstannıń jáhán bazarındaǵı básekige shıdamlılıǵın arttıradı, – dedi Prezidentimiz.

Bul joybarlardı qurıwda pidayılıq kórsetken qurılısshılar, injener hám joybarlawshılar, isbilermen hám investorlarǵa minnetdarshılıq bildirildi.

Bunnan soń mámleketimiz basshısı rámziy túymeni basdı hám 72 iri investiciyalıq joybar jáne 91 sociallıq taraw obekti paydalanıwǵa tapsırıldı.